ՔԱԳՎՆ-Ն ՊԵՏՔ Է ՄԻՋՈՑՆԵՐ ՁԵՌՆԱՐԿԻ «ԶՎԱՐԹՆՈՑ»-ՈՒՄ ՎԱՌԵԼԻՔԻ
ԽՆԴԻՐԸ ԿԱՐԳԱՎՈՐԵԼՈՒ ՀԱՄԱՐ
19-12-2006 17:38:00 | Հայաստան | Տնտեսություն
ԵՐԵՎԱՆ, 19 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: ՀՀ Քաղավիացիայի
գլխավոր վարչությունը պետք է համապատասխան միջոցներ ձեռնարկի
«Զվարթնոց» օդանավակայանում ավիավառելիքի լիցքավորման
ծառայությունների հետ կապված հարաբերությունները կանոնակարգելու
նպատակով: ՀՀ Տնտեսական մրցակցության պաշտպանության պետական
հանձնաժողովի դեկտեմբերի 19-ի նիստում նման որոշում է կայացվել`
հաշվի առնելով ավիավառելիքի սղության տարվա ընթացքում մի քանի
անգամ արձանագրված դեպքերը:
Ըստ հանձնաժողովի, «Զվարթնոց»-ի կառավարիչ «Արմենիա
Միջազգային օդանավակայաններ» (ԱՄՕ) ընկերությունը պարտավոր է
իրականացնել եւ երաշխավորել ավիացիոն ծառայությունների բնականոն եւ
անընդհատ մատուցումը:
Սակայն, «ԱՄՕ»-ի իրավաբան Արմեն Տեր-Տաճատյանը նշեց, որ
ընկերությունը ՀՀ կառավարության հետ կնքված կոնցեսիոն պայմանագրով
վառելիքի պակասի համար որեւէ պատասխանատվություն չի կրում: Այդ իսկ
պատճառով, հանձնաժողովը հանձնարարեց ՔԱԳՎ-ին դիմել ՀՀ
կառավարությանը` կոնցեսիոն պայմանագրում համապատասխան
փոփոխություններ մտցնելու առաջարկով:
Հանձնաժողովի նախագահ Աշոտ Շահնազարյանի խոսքերով,
ավիավառելիքի սղության պատմությունը «միֆ» է, եւ դա արվում է
ներկրողի շահերը պաշտպանելու համար: Հակառակ դեպքում, ըստ նրա,
«ԱՄՕ»-ն այլ ընկերությունից վառելիք գնելու համար միջազգային
մրցույթ կհայտարարեր, ինչը մինչ օրս չի արել: