2006 Թ.-Ի ՀՈՒՆՎԱՐ-ՀՈԿՏԵՄԲԵՐԻՆ ՀՀ ԲՆԱԿՉՈՒԹՅԱՆ ԴՐԱՄԱԿԱՆ
ԵԿԱՄՈՒՏՆԵՐԸ 2,8%-ՈՎ ԳԵՐԱԶԱՆՑԵԼ ԵՆ ԾԱԽՍԵՐԸ
13-12-2006 15:34:00 | Հայաստան | Հասարակություն
ԵՐԵՎԱՆ, 13 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: ՀՀ բնակչության
դրամական եկամուտները 2006թ.-ի հունվար-հոկտեմբերին կազմել են 1
տրլն 304 մլրդ 658,1 մլն դրամ (ավելի քան 3 մլրդ 68 մլն ԱՄՆ
դոլար), իսկ դրամական ծախսերը` 1 տրլն 268 մլրդ 168,6 մլն դրամ:
Այդ ցուցանիշները 2005թ.-ի հունվար-հոկտեմբերի համեմատ աճել են,
համապատասխանաբար, 19,6%-ով եւ 19,9%-ով:
ՀՀ Ազգային վիճակագրական ծառայության տվյալներով, բնակչության
իրական տնօրինվող դրամական եկամուտները (եկամուտները` հանած
պարտադիր վճարումները, հաշվի առած սպառողական գների ինդեքսների
փոփոխությունները) 2006թ.-ի հունվար-հոկտեմբերին 2005թ.-ի նույն
ամիսների նկատմամբ աճել են 17%-ով:
2006թ.-ի սեպտեմբերին միջին ամսական անվանական աշխատավարձը
սահմանված նվազագույն աշխատավարձը գերազանցել է 4,4 անգամ`
2005թ.-ի սեպտեմբերի 4,1 անգամի համեմատ:
Բնակչության դրամական եկամուտների 78%-ն օգտագործվել է
ապրանքների գնման եւ ծառայությունների վճարման համար (2005թ.-ի
հունվար-հոկտեմբերին` 79,5%-ը), պարտադիր վճարումների եւ կամավոր
մուծումների համար` 5,4%-ը (5,6%), ավանդների հավելաճի համար`
0,9%-ը (0,3%), արտարժույթի գնման համար` 12,9%-ը (11,6%):
Այս տարվա հունվար-հոկտեմբերին ՀՀ բնակչության դրամական
ծախսերը կազմել են եկամուտների 97,2%-ը` նախորդ տարվա նույն
ժամանակահատվածի 97%-ի դիմաց: