ԵՐԵՎԱՆ, 11 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Գենդերային
խտրականության վերացումը եւ կանանց իրավունքների ընդլայնումը
դրական ազդեցություն կունենա երեխաների գոյատեւման եւ
բարեկեցության հարցում: Այս մասին ասված է «Երեխաների իրավիճակն
աշխարհում» զեկույցում, որի շնորհանդեսը կայացված դեկտեմբերի 11-ին
ՅՈՒՆԻՍԵՖ-ի 60-ամյակի շրջանակում: Ըստ զեկույցի, գենդերային
հավասարությունը կրկնակի շահավետ է եւ կանանց, եւ երեխաների համար,
եւ մեծ նշանակություն ունի համայնքների, ընտանիքների եւ ազգերի
առողջության ու զարգացման համար:
Չնայած Հայաստանը մեծ առաջընթաց է ունեցել կանանց համար
հավասար իրավունքների եւ հնարավորությունների ապահովման հարցում,
այսուամենայնիվ, դեռեւս կան ոլորտներ, որտեղ համատեղ ջանքեր են
անհրաժեշտ խտրականությունը եւ անհավասարությունը վերացնելու համար:
Մասնավորապես, կանանց թիվը Հայաստանի քաղաքական կառույցներում,
ինչպես նաեւ կառավարության վերադաս պաշտոններում շարունակում է
մնալ ցածր: Զեկույցում նշված է նաեւ, որ Հայաստանի տնտեսության
գրեթե բոլոր ճյուղերում կանայք ավելի ցածր են վարձատրվում, քան
տղամարդիկ, իսկ կանանց գործազրկության ցուցանիշը ավելի բարձր է,
քան տղամարդկանց:
ՅՈՒՆԻՍԵՖ-ի ներկայացուցիչ Շելդոն Գեւեթը զեկույցի
շնորհանդեսում նշել է, որ անհրաժեշտ է կանանց կարգավիճակը
բարելավել եւ ընտանիքում, եւ աշխատավայրում, եւ քաղաքական դաշտում:
Վերոնշյալ ասպարեզներից ցանկացած մեկում բարելավումը կազդի կանանց
հավասարության վրա այլ ասպարեզներում եւ դրական կանդրադառնա
երեխաների բարեկեցության եւ զարգացման վրա: