ՆՈՅԵՄԲԵՐԻ 30-Ի ԴՐՈՒԹՅԱՄԲ ՓՈԽՀԱՏՈՒՑՈՒՄ ԵՆ ՍՏԱՑԵԼ ՇՈՒՐՋ 3000
ԱՎԱՆԴԱՏՈՒՆԵՐ
30-11-2006 19:45:00 | Հայաստան | Հասարակություն
ԵՐԵՎԱՆ, 30 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Նոյեմբերի 30-ի
դրությամբ փոխհատուցում են ստացել նախկին ԽՍՀՄ Խնայբանկի ՀԽՍՀ
հանրապետական բանկում մինչեւ 1993թ.-ի հունիսի 10-ը ներդրված
ավանդներ ունեցող շուրջ 3000 քաղաքացիներ: Ինչպես նույն օրվա
ասուլիսում նշեց ՀՀ Աշխատանքի եւ սոցիալական հարցերի նախարարության
Սոցիալական աջակցության վարչության պետ Աստղիկ Մինասյանը,
դեկտեմբերին նախատեսվում է վճարել 200 մլն դրամի փոխհատուցում`
1300-1700 անձանց:
Նախարար Աղվան Վարդանյանի տեղեկացմամբ, փոխահատուցման ամփոփ,
ինչպես նաեւ վիճահարույց տվյալներով, ավանդատուների ցուցակներ
կազմելու կարգում ՀՀ կառավարության որոշմամբ փոփոխություն
կատարելու արդյունքում փոխհատուցման իրավունք ունեցող 61 հազար 680
անձից ցուցակներում ընդգրկվել է 59 հազար 650-ը: Մինչ այդ վճարման
ամփոփ ցուցակներում ընդգրկված էին 27 հազար 435 անձ, իսկ մնացածը
ունեին վիճահարույց խնդիրներ: Ըստ նախարարի, փոփոխությունը
հնարավորություն է տվել ցուցակները 96%-ով հստակեցնել:
Նշենք, որ 2006թ.-ի պետբյուջեով ավանդների դիմաց փոխհատուցման
տրամադրման նպատակով նախատեսվել էր 1 մլրդ դրամ (մոտ 2,6 մլն ԱՄՆ
դոլար):