ՍՈՒՏ ՄԱՏՆՈՒԹՅԱՆ ՓԱՍՏՈՎ ՔՐԵԱԿԱՆ ԳՈՐԾՈՎ ԴԱՏԱՎԱՐՈՒԹՅՈՒՆԸ
ԿՍԿՍՎԻ ԴԵԿՏԵՄԲԵՐԻ 18-ԻՆ
29-11-2006 16:10:00 | Հայաստան | Հասարակություն
ԵՐԵՎԱՆ, 29 ՆՈՅԵՄԲԵՐԻ, ՆՈՅՅԱՆ ՏԱՊԱՆ: ՀՀ հարկային պետական
ծառայության օպերատիվ-հետախուզական վարչության պետ Շահեն
Հովասափյանի սպանության քննության ընթացքում սուտ մատնության
փաստով գործի դատավարությունը կսկսվի դեկտեմբերի 18-ին` Երեւանի
Կենտրոն եւ Նորք-Մարաշ համայնքների 1-ին ատյանի դատարանի նախագահ
Ժորա Վարդանյանի նախագահությամբ: Այս մասին «ՆՈՅՅԱՆ ՏԱՊԱՆ»-ի
թղթակիցը տեղեկացավ դատարանի նախագահի գրասենյակից:
Հիշեցնենք, որ Շ.Հովասափյանի սպանության գործի քննության
ընթացքում բացահայտվել է, որ վրեժ լուծելու նպատակով ՀՀ
ոստիկանության Դավիթաշենի բաժնի օպերլիազոր Գեւորգ Գեւորգյանը սուտ
մատնություն է կատարել եւ սպանության մեջ մեղադրել Սահակ
Արսենյանին եւ Ժիրայր Հայրապետյանին: Նախնական համաձայնության
գալով ՀՀ ԱԱԾ Սահմանապահ զորքերի Բագրատաշենի հսկիչ անցագրային
կետի պետի տեղակալ, կապիտան Արտավազդ Մելիքյանի հետ, Գ.Գեւորգյանը
պատրաստել է անստորագիր նամակ քրեական գործ հարուցելու
իրավասություն ունեցող մարմնին հանձնելու համար. նամակում նշվել
են Ս.Արսենյանի եւ Ժ.Հայրապետյանի կողմից Էդուարդ Շաթիրյանից
պայթուցիկ սարք ձեռք բերելու եւ սպանություն կատարելու ենթադրյալ
հանգամանքները: Շ.Հովասափյանի սպանությանը հաջորդած օրերին այդ
նամակը Գ.Գեւորգյանը գցել է Իտալիայի դեսպանատան փոստարկղը: Իսկ
Ա.Մելիքյանն էլ սուտ տեղեկատվություն է նշել ինֆորմացիայի աղբյուրի
վերաբերյալ:
Ձեռք բերված ապացույցների հիման վրա Գ.Գեւրգյանին մեղադրանք է
առաջադրվել ՀՀ Քրեական օրենսգրքի 333 հոդվածի 2-րդ մասի 1-ին
կետով, 268 հոդվածի 1-ին եւ 271 հոդվածի 1-ին մասերով, իսկ
Ա.Մելիքյանին` 333 հոդվածի 2-րդ մասի 1-ին կետով: