ԴԵԿՏԵՄԲԵՐԻ 3-ԻՆ ԼՈՍ ԱՆՋԵԼԵՍՈՒՄ ԿԱՆՑԿԱՑՎԻ ՀԵՌՈՒՍՏԱՄԱՐԱԹՈՆ` Ի
ՆՊԱՍՏ ՀԱՅԱՍՏԱՆԻ ԾՆՈՂԱԶՈՒՐԿ ԵՐԵԽԱՆԵՐԻ
21-11-2006 16:15:00 | Հայաստան | Հասարակություն
ԵՐԵՎԱՆ, 21 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Դեկտեմբերի 3-ին Լոս
Անջելեսում տեղի կունենա հեռուստատեսային մարաթոն, որի նպատակն է
սատար կանգնել Հայաստանում ապրող ծնողազուրկ երեխաներին եւ
մանկատան սաներին: Ինչպես նշված է «ՆՈՅՅԱՆ ՏԱՊԱՆ»-ին տրամադրած
հաղորդագրությունում, մարաթոնը կազմակերպում է Լոս Անջելեսի «Քաջ
Նազար» ամսաթերթի եւ հեռուստաժամի խմբագիր Հովահաննես Բալայանը:
Մարաթոնի հանգանակությունների միջոցով Հայաստանում արդեն 7-րդ
անգամ կանցկացվեն Ամանորի բարեգործական միջոցառումներ` Հայաստանի
Պետական ֆիլհարմոնիայի հետ համատեղ:
Նախատեսվում է, որ 2007թ.-ին Սուրբ ծննդի հանդեսներին
կմասնակցեն 20 հազարից ավելի հայ մանուկներ: Տոնակատարությունները
տեղի կունենան Ա.Խաչատրյանի եւ Ա.Բաբաջանյանի անվան
համերգասրահներում, Հայաստանի բոլոր մանկատներում եւ
ծերանոցներում: