ԼԵՀԵՐԸ ՈՒՆԵՆ ՀՈԳԵՎՈՐ ԿԱՊԻ ԵՎ ՊԱՏՄԱԿԱՆ ՆՄԱՆՈՒԹՅԱՆ ԶԳԱՑՈՒՄ
ՀԱՅ ԺՈՂՈՎՐԴԻ ՀԵՏ, ԿԱՐԾՈՒՄ Է ՍԵՆԱՏԻ ՄԱՐՇԱԼԸ
07-11-2006 17:40:00 | Հայաստան | Հասարակություն
ԷՋՄԻԱԾԻՆ, 7 ՆՈՅԵՄԲԵՐԻ, ՆՈՅՅԱՆ ՏԱՊԱՆ: 2005 թվականին
Լեհաստանի Սեյմում Հայոց ցեղասպանության ճանաչման, ինչպես նաեւ հայ
համայնքի հանդեպ մշտապես ցուցաբերվող ազնիվ ու բարյացակամ
վերաբերմունքի համար Լեհաստանի Հանրապետության իշխանություններին
իր գնահատանքն է հայտնել Ն.Ս.Օ.Տ.Տ. Գարեգին Բ Ամենայն Հայոց
Կաթողիկոսը: Մայր Աթոռ Ս. Էջմիածնում նոյեմբերի 7-ին ընդունելով
Լեհաստանի Հանրապետության Սենատի Մարշալ Բոգդան Բորուսեւիչի
գլխավորած պաշտոնական պատվիրակությանը` ՀՀ ԱԺ ներկայացուցիչների եւ
երկու երկրների դեսպանների ուղեկցությամբ, Նորին Սրբությունը
շնորհավորել է Բ.Բորուսեւիչին նոյեմբերի 11-ի Լեհաստանի
Անկախության օրվա առիթով` մաղթելով լեհ աստվածասեր ժողովրդին խաղաղ
եւ բարօր կյանք:
«Նման այցելությունները գալիս են նպաստելու մեր երկու
ժողովուրդների եւ երկրների միջեւ հարաբերությունների սերտացմանը»,-
ընդգծել է Նորին Սրբությունը` անդրադառնալով երկու ժողովուրդների
դարավոր բարեկամությանը եւ երկու երկրների միջեւ ձեւավորված
համագործակցությանը:
Բ.Բորուսեւիչը, խոսելով լեհ-հայկական դարավոր
հարաբերությունների մասին, նշել է Լեհաստանի պատմության մեջ հայերի
կարեւոր ներդրման մասին: «Ճիշտ է ներկայիս մեր հարաբերություններն
այդչափ սերտ չեն, ինչպես անցյալում, սակայն համակրանքը Հայաստանի
եւ հայերի հանդեպ պահպանվում է...: Մենք հոգեւոր կապ ենք զգում հայ
ժողովրդի հետ, ունենք նաեւ պատմական նմանության զգացում»,- նշել է
Սենատի Մարշալը:
Հանդիպման ընթացքում Ամենայն Հայոց Հայրապետն անդրադարձել է
Լեհաստանում ապրող հայ համայնքի հոգեւոր եւ եկեղեցական կյանքի
կազմակերպման խնդրին: Բ.Բորուսեւիչը տեղեկացրել է, որ առաջիկայում
Լեհաստանի իշխանությունները պաշտոնապես կգրանցեն Հայաստանյայց
Առաքելական Եկեղեցին եւ համայնքը:
Հանդիպմանը խոսվել է նաեւ երկու ժողովուրդների կյանքում իրենց
եկեղեցիների կարեւոր առաքելության մասին: