ԵՐԵՎԱՆՈՒՄ ԲԱՑՎԵՑ ՀԱՅԱՍՏԱՆՈՒՄ ՄԱՀԱՑԱԾ ՌՈՒՄԻՆԱՑԻ
ՌԱԶՄԱԳԵՐԻՆԵՐԻ ՀԻՇԱՏԱԿԻՆ ՆՎԻՐՎԱԾ ՀՈՒՇԱԿՈԹՈՂ
25-10-2006 18:45:00 | Հայաստան | Հասարակություն
ԵՐԵՎԱՆ, 25 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Երեւանի
Քանաքեռ-Զեյթուն համայնքում հոկտեմբերի 25-ին բացվեց 1941-45թթ.-ի
աշխարհամարտում գերի ընկած եւ Հայաստանում մահկանացուն կնքած
ռումինացի ռազմագերիների հիշատակին նվիրված հուշակոթողը:
Հուշակոթողի կառուցումը ֆինանսավորել է Ռումինիայի
կառավարությունը:
Ինչպես հուշակոթողի բացման հանդիսավոր արարողությանը նշեց
Ռումինիայի զինվորների հիշատակի ասոցիացիայի ներկայացուցիչ
Կրիստիան Սկառլարը, հոկտեմբերի 25-ին նշվում է Ռումինիայի Բանակի
օրը, եւ խորհրդանշական է, որ հենց այսօր է կայանում հուշակոթողի
բացումը: Ըստ նրա, հուշարձանը խորհրդանշում է հայ-ռումինական
դարավոր բարեկամական կապերը:
Հայաստանում Ռումինիայի փոխդեսպան Գաբրիել Գրեկուն նշեց, որ
երկրորդ համաշխարհային պատարերազմի ժամանակ գերի են ընկել 140
հազար ռումինացի զինվորներ, որոնց տեղափոխել են տարբեր երկրներ:
Հայաստան տեղափոխված գերիները ապրել են ճամբարներում եւ մասնակցել
շինարարական աշխատանքների: Ըստ նրա, ոչ ստույգ տվյալներով
Հայաստանում հուղարկավորվել են 175 ռումինացի գերիներ, սակայն
փաստաթղթերում նշվում է 90 գերի:
Պատմաբան Արա Դեմիրխանյանը ընդգծեց նաեւ, որ երկրորդ
համաշխարհային պատերազմից հետո Հայաստան բերված ռազմագերիներից
943-ը թաղվել են այստեղ: