ՍՏՈՐԱԳՐՎԵՑ ԲԱՐՁՐ ԵՎ ՏԵՂԵԿԱՏՎԱԿԱՆ ՏԵԽՆՈԼՈԳԻԱՆԵՐԻ ՈԼՈՐՏՆԵՐՈՒՄ
ՀԱՅ-ԲԵԼԱՌՈՒՍԱԿԱՆ ՀԱՄԱԳՈՐԾԱԿՑՈՒԹՅԱՆ ՀՈՒՇԱԳԻՐ
23-10-2006 19:15:00 | Հայաստան | Տնտեսություն
ԵՐԵՎԱՆ, 23 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Բելառուսի վարչապետ
Սերգեյ Սիդորսկու գլխավորած պատվիրակության Հայաստան այցի
շրջանակներում հոկտեմբերի 23-ին ստորագրվեց բարձր եւ տեղեկատվական
տեխնոլոգիաների ոլորտներում հայ-բելառուսական համագործակցության
հուշագիր: Փաստաթղթի ստորագրմանը ներկա էր Բելառուսի վարչապետը:
Ինչպես լրագրողների հետ զրույցում նշեց «Վիասֆեր Տեխնոպարկ»
ընկերության տնօրեն Արամ Վարդանյանը, նախկինում Հայաստանը
համագործակցել է ռուսական բարձր եւ ՏՏ ոլորտի մի շարք
ընկերությունների, ինչպես նաեւ Մինսկի «Ինտեգրալի» հետ: Ներկայումս
ոլորտում շատ ուղղություններ կան, որոնք, ըստ նրա, հնարավոր է
համատեղ զարգացնել` օգտագործելով ունեցած ներուժը: Մասնավորապես,
ըստ Ա.Վարդանյանի, դա մոնոբյուրեղական սիլիցիումի տեխնոլոգիաներով
համատեղ մեծ արտադրության կազմակերպումն է, մանավանդ, որ
համաշխարհային շուկայում այդ արտադրանքի մեծ պահանջարկ կա:
Բելառուսի «Բարձր տեխնոլոգիարների պարկ»-ի տնօրեն Վալերի
Ցեպկալոն նշեց, որ տեխնոպարկերի ստեղծման համար Բելառուսում
գործում է յուրահատուկ հարկային ռեժիմ: Բացի այդ, կան բավականին
մեծ թվով երիտասարդ մասնագետներ. տարեկան 26 հազար ուսանող է
մասնագիտանում այդ ոլորտում: Ի դեպ, Բելառուսում կա մեկ, իսկ
Հայաստանում մոտ 20 տեխնոպարկ: