ՀԱՅԿԱԿԱՆ ԶԼՄ-ՆԵՐԻ ՀԱՄԱՐ ԻՐԱԴԱՐՁՈՒԹՅՈՒՆՆԵՐԻ ՄԻԱԿՈՂՄԱՆԻ
ԼՈՒՍԱԲԱՆՈՒՄԸ ԴԱՐՁԵԼ Է ՍՈՎՈՐԱԿԱՆ ԵՐԵՎՈՒՅԹ,- ԱՍՈՒՄ Է «Ա1+»-Ի
ԽՄԲԱԳԻՐԸ
20-10-2006 16:04:00 | Հայաստան | Հասարակություն
ԵՐԵՎԱՆ, 20 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Հեռուստատեսության եւ
ռադիոյի մասին օրենքի վերջին նախագիծը վկայում է, որ
տեղեկատվության ազատության կայացմանը նպաստելու ուղղությամբ
Հայաստանում ռազմավարական առումով էական ոչինչ չի արվում: Այսպիսի
կարծիք հայտնեց ՀՀ Մարդու իրավունքների պաշտպան Արմեն
Հարությունյանը հոկտեմբերի 20-ին «Հայկական ԶԼՄ-ները 2007թ.-ի
խորհրդարանական ընտրությունների նախաշեմին» թեմայով կլոր սեղանի
ժամանակ: Միջոցառումը կազմակերպել էր "Article 19" միջազգային
հասարակական կազմակերպության հայաստանյան ներկայացուցչությունը:
Ըստ Ա.Հարությունյանի, այս ոլորտին վերաբերող ամեն մի նոր
օրինագիծ պետք է առաջընթացի մեկ հաստատուն քայլ հանդիսանա
տեղեկատվության ազատության ապահովման հարցում: Սակայն,
շրջանառության մեջ դրավծ օրինագիծն ի զորու չէ դառնալու այդպիսին:
Մարդու իրավունքների պաշտպանը նշեց, որ բավարար չէ խոսքի
ազատության թեմային անդրադառնալ միայն ընտրությունների նախաշեմին.
այդ ուղղությամբ անհրաժեշտ է ամենօրյա աշխատանք տանել:
Ա.Հարությունյան նաեւ համոզմունք հայտնեց, որ միայն քաղաքական
բազմակարծություն ապահովելու դեպքում հնարավոր կլինի բարձրացնել
հասարակության տեղեկացվածության աստիճանը:
«Ա1+» էլեկտրոնային թերթի խմբագիր Մեսրոպ Մովսիսյանի
խոսքերով, «եթե մի որեւէ երկրում շատ է խոսվում մամուլի ազատության
մասին, նշանակում է` երկիրն ունի լուրջ հիմնախնդիրներ այդ
ոլորտում»: Ըստ նրա, «2003թ.-ի ընտրությունների ժամանակ ԶԼՄ-ների
«դառը փորձը» ցույց տվեց, որ Հայաստանում բազմակարծությունը
ձեւական բնույթ է կրում. իրադարձությունների միակողմանի
լուսաբանումը սովորական երեւույթ է դարձել»:
Մ.Մովսիսյանն ընդգծեց, որ ըստ իր դիտարկումների, այսօր հայ
հասարակությունը «շուկայում լսած լուրերին ավելի շատ է հավատում,
քան թե հեռուստատեսությամբ հաղորդված պաշտոնական տեղեկատվությանը»: