ՀԱՅԱՍՏԱՆԸ ՀԱՇՎԻ ԿԱՌՆԻ ՀԱՆՑԱԳՈՐԾՈՒԹՅՈՒՆՆԵՐԻՑ ՏՈՒԺՈՂՆԵՐԻՆ
ՕԺԱՆԴԱԿՈՒԹՅԱՆ ԵԽ ԵՐԿՐՆԵՐԻ ԴՐԱԿԱՆ ՓՈՐՁԸ,- ՀԱՅՏԱՐԱՐՈՒՄ Է ՀՀ
ԱՐԴԱՐԱԴԱՏՈՒԹՅԱՆ ՆԱԽԱՐԱՐԸ
13-10-2006 16:23:00 | Հայաստան | Հասարակություն
ԵՐԵՎԱՆ, 13 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Եվրոպական երկրների
արդարադատության նախարարների 27-րդ համաժողովը անհետեւանք չի լինի
Հայաստանի համար. անպայման հաշվի կառնվեն բոլոր երկրների դրական
փորձը, հնչած կարծիքները, կկատարվեն նաեւ օրենսդրական
փոփոխություններ: Այս մասին համաժողովի հոկտեմբերի 13-ի ամփոփիչ
ասուլիսում հայտարարեց ՀՀ արդարադատության նախարար Դավիթ
Հարությունյանը:
Նա նշեց, որ երկօրյա համաժողովի ընթացքում ԵԽ անդամ 46
պետություններից 43-ի ներկայացուցիչների մասնակցությամբ քննարկվել
է խիստ արդիական` «Զոհեր. կարգավիճակ, իրավունքներ եւ
օժանդակություն» թեման: Հատկապես ուշադրություն է դարձվել
հանցագործության զոհերին օժանդակության, ընտանեկան բռնության,
հանցավորության կանխարգելման հարցերին: Նշվեց, որ հաջորդ
համաժողովը տեղի կունենա 2007թ.-ի վերջին կամ 2008թ.-ի սկզբին
Կանարյան կղզիներում:
Ի պատասխան թղթակիցների հարցերի, ՀՀ արդարադատության նախարարը
նշեց, որ մի շարք երկրներում տուժողներին աջակցության պրակտիկան
կիրառվում է շուրջ 2 տասնյակ տարի: Այդ առումով, ըստ նախարարի,
ուսանելի է Ավստրիայի, Բելգիայի, Մեծ Բրիտանիայի փորձը: Նա
ընդգծեց, որ նույն գործընթացը Հայաստանում չպետք է հախուռն,
մեկանգամյա բնույթ կրի, այլ պետք է իրականացվի մշտապես գործող
պետական կառույցի կողմից: «Առաջին քայլերին ականատես կլինեք շատ
շուտով` մոտակա 2 ամսվա ընթացքում»,- հավաստիացրեց
Դ.Հարությունյանը: