ՀՀ ԱԺ-ՈՒՄ ՁԱԽՈՂՎԵՑ ԱՌԱՋԻՆ ԸՆԹԵՐՑՄԱՄԲ ՀԵՌԱՐՁԱԿՄԱՆ ՈԼՈՐՏԻՆ
ՎԵՐԱԲԵՐՈՂ ՕՐԵՆՍԴՐԱԿԱՆ ՓՈՓՈԽՈՒԹՅՈՒՆՆԵՐԻ ՓԱԹԵԹԻ ԸՆԴՈՒՆՈՒՄԸ
03-10-2006 17:24:00 | Հայաստան | Հասարակություն
ԵՐԵՎԱՆ, 3 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: ՀՀ Ազգային Ժողովի
հոկտեմբերի 3-ի նիստում ձախողվեց հեռարձակման ոլորտին վերաբերող
օրենսդրական փոփոխությունների փաթեթի ընդունումը 1-ին ընթերցմամբ:
Որոշում ընդունելու համար անհրաժեշտ թվով ձայներ չստացավ նաեւ
ՀՀ նախագահի առաջարկը` 1992թ. հուլիսի 6-ի «ԱՊՀ Տնտեսական դատարանի
կարգավիճակի մասին» համաձայնագրի գործողությունը ՀՀ-ի համար
դադարեցնելու նպատակահարմարության վերաբերյալ: Մինչ քվեարկությունը
անկախ պատգամավոր Հմայակ Հովհաննիսյանը հայտարարեց, որ հարցի լուրջ
քննարկում տեղի չի ունեցել եւ ՀՀ նախագահի պաշտոնական
ներկայացուցիչը հիշյալ առաջարկը, ըստ էության, չի հիմնավորել:
Պատգամավորը կոչ արեց իր գործընկերներին չքվեարկել բացակայողների
փոխարեն, եւ արդյունքում նախագիծը ստացավ ընդամենը 61 «կողմ» ձայն`
առանց «դեմ»-ի եւ «ձեռնպահ»-ի:
Նիստում ԱԺ-ն ընդունեց նախկինում քննարկված շուրջ 15
օրինագծեր ու օրենսդրական փաթեթներ:
Վավերացվեց 2005թ.-ի սեպտեմբերի 20-ին եւ դեկտեմբերի 30-ին
հայտագրերի փոխանակման ձեւով ստորագրված «ՀՀ կառավարության եւ ԱՄՆ
կառավարության միջեւ ընդունող պետությունում պաշտոնական
պարտականություններ կատարող ծառայողների խնամքի տակ գտնվող անձանց
աշխատանքի մասին» համաձայնագիրը:
Ընդունված օրինագծերի թվում էր նաեւ ԱԺ-ի կանոնակարգ-օրենքում
փոփոխություններ եւ լրացումներ նախատեսող օրինագիծը, որը հեղինակել
էին ԱԺ-ում ներկայացված բոլոր քաղաքական ուժերը, բացառությամբ
«ՄԱԿ» խմբակցույան: Վերջինիս կողմից ներկայացված այլընտրանքային
օրինագիծը հավանության չարժանացավ` ստանալով ընդամենը 21 «կողմ»,
34 «դեմ» եւ 2 «ձեռնպահ» ձայներ: