ՎՐԱՍՏԱՆԻ ԱԳՆ ՂԵԿԱՎԱՐԻ ՏԵՂԱԿԱԼԸ ԸՆՏՐՎԵԼ Է ՎՈՒԱՄ-Ի ԳԼԽԱՎՈՐ
ՔԱՐՏՈՒՂԱՐ
26-09-2006 18:35:00 | Ադրբեջան | Միջազգային
ԲԱՔՈՒ, 26 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Վրաստանի արտաքին
գործերի փոխնախարար Վալերի Չեչելաշվիլին ընտրվել է ՎՈՒԱՄ`
Ժողովրդավարության եւ տնտեսական զարգացման կազմակերպության գլխավոր
քարտուղար:
Ինչպես «Դեյ.ազին» հայտնի է դարձել Ադրբեջանի ԱԳՆ
աղբյուրներից, այդ որոշումն ընդունվել է սեպտեմբերի 25-ին Նյու
Յորքում ՄԱԿ-ի գլխավոր վեհաժողովի շրջանակում կայացած
կազմակերպության անդամ երկրների արտաքին գործերի նախարարների
խորհրդի նիստում:
Նախարարները հաստատել են տարածաշրջանային հակամարտությունների
կարգավորման նկատմամբ հայացքների միասնությունը եւ համատեղ
հայտարարություն ընդունել Մերձդնեստրի հանրաքվեի առնչությամբ`
դատապարտելով մերձդնեստրցի անջատողականների միջազգային իրավունքին
հակասող այդ քայլը:
Նիստում նաեւ որոշում է ընդունվել ՎՈՒԱՄ շրջանակում
խաղաղարարական ուժերի եւ քաղաքացիական ոստիկանության
ստորաբաժանումների ստեղծմանն ուղղված գործողությունների ակտիվացման
վերաբերյալ: