ԵՐԵՎԱՆՈՒՄ ԱՇԽԱՏԱՆՔԸ ՍԿՍԵՑ «ՀԱՅԱԳՐՈՖՈՐՈՒՄ» ԵՐԿՐՈՐԴ
ՄԻՋԱԶԳԱՅԻՆ ՀԱՄԱԺՈՂՈՎԸ
22-09-2006 19:00:00 | Հայաստան | Տնտեսություն
ԵՐԵՎԱՆ, 22 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Երեւանում սեպտեմբերի
22-ին աշխատանքը սկսեց «Հայագրոֆորում» երկրորդ միջազգային
համաժողովը: Միջոցառմանը մասնակցում են ՀՀ գյուղատնտեսության,
սննդի արդյունաբերության եւ այդ ոլորտներում գործող
կազմակերպությունների ներկայացուցիչներ, ինչպես նաեւ մի շարք
միջազգային կազմակերպությունների (ՄԱԿ-ի Պարենի եւ
Գյուղատնտեսության կազմակերպությունը, ԱՄՆ Գյուղդեպարտամենտը,
ԱՄՆ-ի Միջազգային զարգացման գործակալությունը, Համաշխարհային
բանկը) եւ Հայաստանում հավատարմագրված դիվանագիտական
ներկայացուցչությունների պաշտոնյաներ:
ՀՀ Գյուղնախարարության կազմակերպած երկօրյա համաժողովի
աշխատանքային խմբերում կքննարկվեն գյուղատնտեսության արտադրության
տեխնոլոգիաների, ագրովերամշակման եւ սննդարդյունաբերական
ապրանքների արտադրության, արտահանման, ներմուծման հետ կապված
խնդիրներ, ոլորտի զարգացման հեռանկարներին եւ միջազգային
համագործակցությանն առնչվող հարցերը: Համաժողովի շրջանակներում
Հայկական պետական ագրարային ակադեմիայում կկայանա գիտաժողով, որին
կմասնակցեն ԱՊՀ եւ արեւելաեվրոպական երկրների գյուղատնտեսական
ԲՈՒՀ-երի ռեկտորներ: