ՀԱՅԱՍՏԱՆ ԵՆ ԲԵՐՎԵԼ ՄԱՐՏԻՐՈՍ ՍԱՐՅԱՆԻ ԵՐԿՈՒ ԿՏԱՎՆԵՐԸ
14-09-2006 19:00:00 | Հայաստան | Մշակույթ
ԵՐԵՎԱՆ, 14 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Օրերս Ռուսաստանից եւ
Թուրքմենիայից Հայաստան են բերվել հայ մեծ նկարիչ Մարտիրոս Սարյանի
երկու կտավները, որոնք տասնամյակներ շարունակ պահվել են մասնավոր
հավաքածուներում: Ինչպես «ՆՈՅՅԱՆ ՏԱՊԱՆ»-ի թղթակցին հայտնեց
արվեստաբան Շահեն Խաչատրյանը, Թուրքմենիայից բերված «Մեջիթներ
Թուրքմենիայում» կտավը արվել է 1934թ.-ին, երբ Մ.Սարյանը
գործուղման է մեկնել Թուրքմենիա: Մյուս նկարը, որ կոչվում է
«Լեռնային բնանկար», վարպետը վրձնել է 1952թ.-ին:
«Ուրախ եմ, որ Սարյանի գործերը վերադարձել են հայրենիք: Իմ
միակ ցանկությունն է, որ Հայաստան բերվեն մեր նկարիչների գործերը,
այլ ոչ թե այստեղից տարվեն անհայտ ուղղությամբ»,- նշեց
Շ.Խաչատրյանը: