ՊԵՏՔ ԷՐ ԱՎԵԼԻ ԼՈՒՐՋ ՆԱԽԱՊԱՏՐԱՍՏՎԵԼ ՓԱՌԱՏՈՆԻՆ,- ԳՏՆՈՒՄ Է ԱԻՄ
ՆԱԽԱԳԱՀԸ
28-06-2006 17:10:00 | Հայաստան | Մշակույթ
ԵՐԵՎԱՆ, 28 ՀՈՒՆԻՍԻ, ՆՈՅՅԱՆ ՏԱՊԱՆ: «Մեկ ազգ, մեկ մշակույթ»
համահայկական մշակութային երկրորդ փառատոնը կազմակերպելուց առաջ
պետք էր ավելի լուրջ նախապատրաստվել: Այս կարծիքը հայտնեց «ՆՈՅՅԱՆ
ՏԱՊԱՆ»-ի թղթակցի հետ զրույցում «Ազգային ինքնորոշում» միավորման
նախագահ Պարույր Հայրիկյանը:
Ըստ նրա, այս փառատոնը միայն ճանաչողական բնույթ է կրում,
սակայն ժամանակն է անցնել գործնական քայլերի: Պ.Հայրիկյանը նշեց,
որ այս տարի ԱՊՀ երկրները մեծ շուքով նշում են իրենց անկախության
15-ամյակը, իսկ Հայաստանում կազմակերպվող «Մեկ ազգ, մեկ մշակույթ»
փառատոնի ընթացքում այդ մասին նույնիսկ չխոսվեց: «Աշխարհասփյուռ
հայերը հավաքվել են հայրենիքում, եւ սա առիթ էր, որպեսզի մեծ
շուքով նշվեր մեր անկախության 15-ամյակը: Ազգը միասնական է դառնում
առաջին հերթին իր պետականությամբ, բայց այսօր այդ պետականությունը
չի արժեվորվում»,- նշեց Պ.Հայրիկյանը: