ՀՀ ԿԱՌԱՎԱՐՈՒԹՅՈՒՆԸ «ՄԵԿ ԱԶԳ, ՄԵԿ ՄՇԱԿՈՒՅԹ» ՀԱՄԱՀԱՅԿԱԿԱՆ
ՄՇԱԿՈՒԹԱՅԻՆ ԵՐԿՐՈՐԴ ՓԱՌԱՏՈՆԻ ԱՆՑԿԱՑՄԱՆ ՀԱՄԱՐ ՀԱՏԿԱՑՐԵԼ Է 117 ՄԼՆ
ԴՐԱՄ
07-06-2006 19:15:00 | Հայաստան | Մշակույթ
ԵՐԵՎԱՆ, 7 ՀՈՒՆԻՍԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ:
Հայաստան-Սփյուռք մշակութային կապերի ամրապնդման եւ խորացման,
ինչպես նաեւ հայկական մշակույթի միասնական ներկայացման նպատակով
հունիսի 23-30-ը Հայաստանում կանցկացվի «Մեկ ազգ, մեկ մշակույթ»
համահայկական մշակութային երկրորդ փառատոնը: Փառատոնին կմասնակցեն
ավելի քան 2000 արվեստագետներ Հայաստանից, Արցախից, Ֆրանսիայից,
Ավստրիայից, Մեծ Բրիտանիայից, Շվեյցարիայից, ԱՄՆ-ից, Սիրիայից,
Լիբանանից, Իրանից, Ռուսաստանից, Վրաստանից եւ Ղազախստանից:
Ինչպես հունիսի 7-ի ասուլիսում հայտնեց ՀՀ նախագահի օգնական
Վիգեն Սարգսյանը, 2004 թ. առաջին անգամ անցկացված փառատոնը վերաճեց
համազգային տոնախմբության եւ ամրապնդեց «մեկ ազգ լինելու
գիտակցությունն ու զգացումը»: Վ. Սարգսյանի խոսքերով, եթե նախորդ
փառատոնին Սփյուռքից ներկայացվել էին հիմնականում սիրողական
կոլեկտիվներ, ապա այս տարի փառատոնում ընդգրկված են
պրոֆեսիոնալները:
«Մեկ ազգ, մեկ մշակույթ» հիմնադրամի գործադիր տնօրեն Թամար
Պողոսյանը հայտնեց, որ փառատոնի անցկացման համար ՀՀ
կառավարությունը հատկացրել է 117 մլն դրամ (մոտ 275 հազար ԱՄՆ
դոլար): Թ. Պողոսյանը նշեց, որ կառավարությունը նաեւ ստանձնել է
Ջավախքի եւ Արցախի ներկայացուցիչների կեցության հարցը:
Փառատոնի հանդիսավոր բացումը տեղի կունենա հունիսի 23-ին
Կարեն Դեմիրճյանի անվան Մարզահամերգային համալիրում: Հաջորդ օրը`
հունիսի 24-ին, փառատոնի մասնակիցները կայցելեն Ծիծեռնակաբերդ,
այնուհետեւ կհանդիպեն հայ կինոգործիչների հետ, իսկ երեկոյան` ժամը
19:30, կմասնակցեն Գաբրիել Սունդուկյանի անվան Ազգային ակադեմիական
թատրոնում կայանալիք թատերական հանդիսությանը: Հունիսի 25-ը
կնվիրվի գրականությանը. մասնակիցները կայցելեն Մայր Աթոռ Սուրբ
Էջմիածին, այնուհետեւ Շառլ Ազնավուրի անվան հրապարակում կբացվի
գրքի ցուցահանդես-տոնավաճառ: Հաջորդ օրը կկազմակերպվեն
կերպարվեստին նվիրված միջոցառումներ: Հունիսի 27-28-ը Երեւանի
համերգասրահներում կանցկացվեն ժողովրդական, դասական եւ էստրադային
երաժշտությանը նվիրված համերգներ, ինչպես նաեւ պարի-շքերթ փառատոն:
Փառատոնի շրջանակում համերգներ կկազմակերպվեն ոչ միայն
Երեւանում, այլեւ Հայաստանի տարբեր մարզերում եւ Լեռնային
Ղարաբաղում:
Փառատոնի հանդիսավոր փակումը կկայանա հունիսի 30-ին:
Նշենք, որ պահպանվել է «Մեկ ազգ, մեկ մշակույթի» փառատոնի
խորհրդանիշը` Նարեն եւ Նարեկը: