ԱԿԻՖ ՆԱԳԻ. ՉԱՐԺԵ ԻՆՉ-ՈՐ ԲԱՆ ՍՊԱՍԵԼ ՀԱՅԱՍՏԱՆԻ ԵՎ ԱԴՐԲԵՋԱՆԻ
ՆԱԽԱԳԱՀՆԵՐԻ ԲՈՒԽԱՐԵՍՏԻ ՀԱՆԴԻՊՈՒՄԻՑ
02-06-2006 12:05:00 | Ադրբեջան | Միջազգային
ԲԱՔՈՒ, 2 ՀՈՒՆԻՍԻ, ՆՈՅՅԱՆ ՏԱՊԱՆ: Ինչպես Ռամբույեի հանդիպման
ժամանակ, Բուխարեստի առաջիկա բանակցությունների շուրջ չարդարացված
իրարանցում է ստեղծվում: Կարծիք է հայտնվում, որ իբր որոշակի պահեր
արդեն համաձայնեցված են, բայց թե որոնք են այդ կետերը, անհայտ է:
Չարժե ինչ-որ բան սպասել ռումինական մայրաքաղաքում կայանալիք
հանդիպումից: Հայաստանը չի ծրագրում նահանջել իր դիրքերից, իսկ
մենք արդեն թաքնվելու տեղ չունենք: Հարկ է հասկանալ, որ Ադրբեջանը
չի կարող զիջումների գնալ երեք հիմնական հարցերում` անթույլատրելի
է Քելբաջարի եւ Լաչինի հայկական վերահսկողության տակ պահելը,
խաղաղապահ զորակազմի մուտքը հակամարտության շրջան, ինչպես նաեւ
անընդունելի է հանրաքվեի անցկացումը Լեռնային Ղարաբաղի ապագայի
վերաբերյալ: Համանախագահող երկրները փորձում են մեզ հակել
զիջումների հենց այդ երեք ուղղություններով: Դա կնշանակի Լեռնային
Ղարաբաղի կորուստ: Այս տեսակետն է արտահայտել «Էխո» թերթի
հարցազրույցում Ղարաբաղի ազատագրության կազմակերպության ղեկավար
Ակիֆ Նագին, որը գրավյալ հողերի խնդրի լուծման առավել կոշտ ուղու
կողմնակից է:
Ի պատասխան այն հարցին, թե «Ինչպե՞ս եք պատկերացնում
բանակցային գործընթացի շարունակությունը», Ա.Նագին ասել է.
«Բուխարեստի հանդիպումը թռուցիկ բնույթ ունի, եւ ոչ ոք նրանից
ինչ-որ առանձնահատուկ բան չի սպասում: Հնարավոր է, ռումինական
մայրաքաղաքի հանդիպումը միջանկյալ լինի եւ հետո կայանա նախագահների
առանձին հանդիպում` նվիրված բացառապես գրավյալ հողերի խնդրին»: