ՀԱՅ ԵՐԻՏԱՍԱՐԴԻ ՆՈՐ ՍՊԱՆՈՒԹՅՈՒՆ ՄԵՐՁՄՈՍԿՈՎՅԱՆ
ԷԼԵԿՏՐԱԳՆԱՑՔՈՒՄ
30-05-2006 15:35:00 | Ռուսաստան | Միջազգային
ՄՈՍԿՎԱ, 30 ՄԱՅԻՍԻ, ՆՈՅՅԱՆ ՏԱՊԱՆ: Մոսկվայում նորից սպանվել է
Հայաստանի քաղաքացի: Հարձակումը մերձմոսկովյան էլեկտրագնացքում
կատարվել է դեռեւս մայիսի 25-ին, սակայն դրա մասին հայտնի է դարձել
միայն հիմա: Մերձմոսկովյան «Սոֆրինո» շրջան մեկնող գնացքի
վագոնում, «Կլյազմա» կայարանի շրջանում, սպանվել է 19 տարեկան
Արթուր Սարդարյանը: Նա Մոսկվայից վերադառնում էր մերձմոսկովյան
Պուշկինո քաղաք:
Մարդասպանները նրան ետեւից դանակով հարված են հասցրել վզին,
կտրելով քներակը, հետո հինգ անգամ դանակով հարվածել են զոհի
կրծքին, սրտի շրջանում: Որից հետո ստոպ-կռանով կանգնեցրել գնացքը
եւ փախել: Հարձակվողները եղել են առնվազն երկու հոգի,- հաղորդում է
SOVA-ն:
Հանցագործության հետաքննությամբ զբաղվում է Յարոսլավլի
երկաթուղու ՆԳՎ-ն: Մոսկվայի դատախազությունը հաստատել է
հայաստանցու սպանության փաստը: Քրեական գործ է հարուցվել
«սպանություն ազգային ատելության դրդապատճառով» հոդվածի
հատկանիշներով: Ըստ սպանության ականատեսների, իրավապահ մարմինները
պատրաստել են հարձակվողների ֆոտոռոբոտները:
Արթուր Սարդարյանը ծնվել էր Բաքվում, իսկ Ադրբեջանում հայերի
զանգվածային ջարդերից հետո ընտանիքով 1989 թվականին տեղափոխվել
Մոսկվա:
Ըստ փաստաբան Սիմոն Ծատուրյանի, հանցագործության վկա են
դարձել էլեկտրագնացքի մոտ 20 ուղեւորներ: Վկաները լսել են, թե
ինչպես են հարձակվողները բղավել «Փառք Ռուսաստանին»:
Հիշեցնենք, որ նման դեպք Մոսկվայում տեղի էր ունեցել ապրիլի
22-ին «Պուշկինսկայա» կայարանում: Բազմաթիվ վկաների աչքի առաջ
սափրագլուխները սպանել էին 17-ամյա հայ ուսանող Վիգեն
Աբրահամյանցին: