ԵՐԵՎԱՆ, 18 ՄԱՅԻՍԻ, ՆՈՅՅԱՆ ՏԱՊԱՆ: 2000թ.-ից սկսած ամեն տարի Ֆրանսիայի Վալանս քաղաքից Իջեւանում հանգրվանում է շուրջ 50 զբոսաշրջիկ: Այս մասին մայիսի 18-ի ասուլիսում հայտնեց Իջեւանի քաղաքապետ Վարուժան Ներսիսյանը: Նրա խոսքերով, Իջեւանը եւ Վալանսը քույր քաղաքներ են արդեն 10 տարի: Նրանց միջեւ զբոսաշրջության ոլորտում համագործակցության ծրագրի շրջանակներում, Վալանսի քաղաքապետարանի աջակցությամբ, 2000թ.-ից Իջեւան են հրավիրվում զբոսաշրջության ոլորտի ֆրանսիացի փորձագետներ: Նրանց խորհրդատվությամբ, Իջեւանում բարեկարգվել եւ կահավորվել են մոտ 70 բնակարաններ, քանի որ Իջեւանում մեծ թվով զբոսաշրջիկներ ընդունելու համար անհրաժեշտ հյուրանոցներ չկան: Ըստ Վ.Ներսիսյանի, Վալանսի քաղաքապետարանի աջակցությամբ Ֆրանսիայում վերապատրաստվել են Իջեւանի դպրոցների ֆրանսերենի ուսուցիչները, իսկ Երեւանի Բրյուսովի անվան օտար լեզուների համալսարանի ֆրանսերենի բաժնի իջեւանցի ուսանողները ֆրանսիայում անցել են թարգմանչության եւ զբոսավարության դասընթացներ:

---