ՀԱՅԱՍՏԱՆԻ ԹԱՏՐՈՆՆԵՐԻ ՄԵՋ ՀԱՃԱԽԵԼԻՈՒԹՅԱՄԲ ԱՌՋԵՎՈՒՄ Է ԵՐԵՎԱՆԻ
ՀՐԱՉՅԱ ՂԱՓԼԱՆՅԱՆԻ ԱՆՎԱՆ ԴՐԱՄԱՏԻԱԿԱԿԱՆ ԹԱՏՐՈՆԸ
18-05-2006 17:40:00 | Հայաստան | Մշակույթ
ԵՐԵՎԱՆ, 18 ՄԱՅԻՍԻ, ՆՈՅՅԱՆ ՏԱՊԱՆ: Ըստ պաշտոնական
վիճակագրության, Երեւանի Հրաչյա Ղափլանյանի անվան Դրամատիկական
թատրոնն իր 64 տոկոս հաճախելիությամբ համարվում է առաջինը
Հայաստանի թատրոնների մեջ: Սակայն, ինչպես «ՆՈՅՅԱՆ ՏԱՊԱՆ»-ի
թղթակցի հետ զրույցում նշեց Դրամատիկականի գեղարվեստական ղեկավար
Արմեն Խանդիկյանը, դա չի գոհացնում իրենց, քանի որ թատրոնը տարիներ
շարունակ աշխատել է լեփ-լեցուն դահլիճներով:
«Մենք էլի բոլորս հավասար ենք գումարի իմաստով եւ բոլորս`
կիսասոված: Խոսքն ընդհանրապես թատրոնների մասին է»,- նշեց Արմեն
Խանդիկյանը: Նրա խոսքերով, պետությունը երեւի թե մտածում է
թատրոնների մասին, սակայն միանգամից «վիրաբուժական» միջամտություն
անել մշակույթում դժվար է: Պետությունն այսօր ֆինանսավորում է
27-28 պետական թատրոն: Ըստ Խանդիկյանի, եթե պետությունը չկարողանա
պահել այս թատրոնները, ապա «ընդհանրապես կկորցնենք ամեն ինչ»:
Այս ամենից զատ, թատրոնները բեմադրում են ոչ այնքան հետաքրքիր
ներկայացումներ, ինչի վկայությունն է այն, որ վերջին շրջանում
պետական մրցանակի ներկայացված եւ ոչ մի բեմադրություն չի արժանացել
մրցանակի:
Այդուհանդերձ, Արմեն Խանդիկյանը համամիտ չէ ժյուրիի հետ, թե
երկրի այդ բարձրագույն պարգեւին արժանի եւ ոչ մի գործ չի ստեղծվել:
Նա համոզված է, որ նման չափանիշներով բեմադրություններին մոտենալը
եւ մրցանակ չշնոհելը սխալ է:
«Իմ տեղեկություններով, ամեն տարի ոչ մի երկրում չի ստեղծվում
այնպիսի թատերական գործ, որը ցնցի աշխարհը: Դրա համար պիտի
թատերական նոր ուղղություն բացվի: Իսկ մեզանում հանձնաժողովը
փնտրում է այնպիսի ստեղծագործություն, որը հանկարծ բոլորին
պայծառատեսության մեջ կնետի»,- ընդգծեց Արմեն Խանդիկյանը: