ՄԱՅԻՍԻ 14-ԻՆ ԵՐԵՎԱՆՈՒՄ ԿԿԱՅԱՆԱ ԿՈՄՊՈԶԻՏՈՐ ԷԴՎԱՐԴ ՄԻՐԶՈՅԱՆԻ
85-ԱՄՅԱԿԻՆ ՆՎԻՐՎԱԾ ՀԱՄԵՐԳ
11-05-2006 17:30:00 | Հայաստան | Մշակույթ
ԵՐԵՎԱՆ, 11 ՄԱՅԻՍԻ, ՆՈՅՅԱՆ ՏԱՊԱՆ: Հայաստանի տարբեր մարզերում
մինչեւ այս տարեվերջ կանցակցվեն միջոցառումներ` նվիրված
կոմպոզիտոր, ԽՍՀՄ ժողովրդական արտիստ, պետական մրցանակների
դափնեկիր էդվարդ Միրզոյանի 85-ամյակին: Այս մասին մայիսի 11-ի
ասուլիսում հայտնեց «Կադանս» երաժշտական կենտրոնի տնօրեն Նիկա
Բաբայանը: «Է.Միրզոյանը հայ ժողովրդի ամենատաղանդավոր մարդկանցից
մեկն է: Թեեւ կոմպոզիտորի ստեղծագործությունները սակավաթիվ են,
այնուամենայնիվ այդ բոլոր գործերը կարելի է գլուխգործոցներ
համարել»,- նշեց Ն.Բաբայանը:
Է.Միրզոյանի հոբելյանի առիթով ամերիկահայ դաշնակահար Շահան
Արծրունու նախաձեռնությամբ եւ ՀՀ Մշակույթի եւ երիտասարդության
հարցերի նախարարության հովանավորությամբ մայիսի 14-ին Երեւանի
Կոմիտասի անվան կամերային երաժշտության տանը կկայանա համերգ:
Մարտին Վարդազարյանը, Շ.Արծրունին եւ թավջութակահար Մեդեա
Աբրահամյանը կկատարեն կոմպոզիտորի դաշնամուրի եւ թավջութակի համար
գրված պոեմն ու սոնատները, իսկ երգչուհիներ Նունե Բադալյանը եւ
Աննա Մայիլյանը` ռոմանսները:
Ասուլիսին ներկա Է.Միրզոյանը նշեց, որ ինքը պատկանում է այն
մարդկանց թվին, որոնք իրենց կյանքի ընթացքում «ինչ-որ բան արել են
ու թողել հետագա սերունդներին»: «Ժողովուրդը գնահատել է իմ արածը,
եւ քչերին է հաջողվում կենդանության օրոք վայելել ժողովորդի սերն
ու համակրանքը»,- նշեց կոմպոզիտորը: