ԵՐԵՎԱՆ, 18 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Նոյեմբերի 18-ին
Հայաստանի ժուռնալիստների տանն անցկացված ասուլիսը նվիրված էր
Կիպրոսի Լիմասոլ քաղաքում նոյեմբերի 11-13-ին անցկացված կարատեի
աշխարհի պատանեկան առաջնության բացման ժամանակ տեղի ունեցած
միջադեպին: Ըստ մարզաձեւի Հայաստանի ֆեդերացիայի նախագահ Գրիգոր
Միքայելյանի, առաջնության բացման արարողության ժամանակ Ադրբեջանի
մարզիկները խմբով անսպասելիորեն հարձակվել են Հայաստանի հավաքականի
անդամների վրա: Ընդ որում, նրանք ոչ միայն հայ մարզիկներին են
հարվածել, այլեւ ապտակել «Հայաստան» ցուցատախտակը տանող կիպրոսցի
11-12 տարեկան տղային:
Սկիզբ առած կռիվը հաջողվել է հանդարտեցնել մարզադահլիճում
գտնվող անվտանգության ծառայության աշխատակիցների ջանքերով: Նշվեց,
որ ազերիների հրահրած խայտառակ միջադեպը տեղի է ունեցել կարատեի
միջազգային ֆեդերացիայի ղեկավարների, առաջնության մասնակից մյուս
55 երկրների շուրջ 1000 մարզիկների եւ մարզիչների, 2000
մարզասերների աչքի առաջ: Գ.Միքայելյանը հայտնեց, որ
Ըստ Գ.Միքայելյանի, կարատեի միջազգային ֆեդերացիայի
կարգապահական կոմիտեի հաջորդ օրը հրավիրված հատուկ նիստում ինքը
պահանջել է խստորեն պատժել միջադեպի մեղավորներին: Նա նաեւ
պահանջել է, որ ադրբեջանցիները հրապարակավ ներողություն խնդրեն թե
հայ մարզիկներից, թե առաջնության մյուս մասնակիցներից: Կարատեի
միջազգային ֆեդերացիան իր որոշմամբ ադրբեջանցիներին մեկ տարով
որակազրկել են: Այդ ընթացքում նրանք չեն մասնակցի պաշտոնական
մրցումների:
Գ.Միքայելյանը հայտնեց, որ ադրբեջանցիները հենց մրցումների
դահլիճում ներողություն են խնդրել Հայաստանի կարատեիստներից, իսկ
մարզաձեւի Ադրբեջանի ֆեդերացիայի նախագահը հայ մարզիկներից եւ
մարզիչներից ներողություն է խնդրել նաեւ հյուրանոցում: