ՀՈԿՏԵՄԲԵՐԻ 19-23-Ը ՀԱՅԱՍՏԱՆՈՒՄ ԿԿԱՅԱՆԱ ՏԻԿՆԻԿԱՅԻՆ
ԹԱՏԵՐԱԽՄԲԵՐԻ ՀԱՄԱՀԱՅԿԱԿԱՆ ԱՌԱՋԻՆ ՓԱՌԱՏՈՆԸ
18-10-2005 18:05:00 | Հայաստան | Մշակույթ
ԵՐԵՎԱՆ, 18 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ:
Հայաստանի հինգ քաղաքներում` Գյումրիում, Վանաձորում, Գավառում,
Գորիսում եւ Ստեփանակերտում, հոկտեմբերի 19-ին միաժամանակ
կմեկնարկի Տիկնիկային թատերախմբերի համահայկական առաջին փառատոնը:
Փառատոնը, որ կանցկացվի մինչեւ հոկտեմբերի 23-ը, նվիրված է
Հայաստանում տիկնիկային թատրոնի հիմնադրման 70-ամյակին:
Ինչպես հոկտեմբերի 18-ին ասուլիսում նշեց ՀՀ մշակույթի եւ
երիտասարդության հարցերի նախարարության պետական ծրագրերի բաժնի պետ
Գառնիկ Գույումջյանը, Հայաստանի, Ջավախքի եւ Արցախի 22 տիկնիկային
թատերախմբեր ներկայացումներով հանդես կգան Հայաստանի մարզերում եւ
Արցախում: Ըստ նրա, նման փառատոնի անցկացումը մարզերում կխթանի
մշակութային կյանքի աշխուժացումը. «Թատերական շփումներն այսօր օդի
ու ջրի նման անհրաժեշտ են մարզային ստեղծագործողներին: Նրանք կարիք
ունեն նոր խոսքի ու նոր ասելիքի»:
Գ. Գույումջյանի խոսքերով, առաջին անգամ կազմակերպվող
տիկնիկային փառատոնը ինչ-որ առումով նաեւ ստուգատես է` պարզելու,
թե այս տարիների ընթացքում քանի նման տիկնիկային թատրոն է ստեղծվել
Հայաստանում եւ ինչպիսի մասնագիտական կարողություններ ունեն դրանք:
Ըստ նրա, միայն Երեւանում դրանց թիվը 30-ից անցել է: Գ.
Գույումջյանը հույս հայտնեց, որ փառատոնը հետագայում կդառնա
շարունակական եւ կընդգրկի նաեւ սփյուռքահայ թատերախմբերը:
Փառատոնի փակումը տեղի կունենա հոկտեմբերի 23-ին Երեւանում.
Հովհաննես Թումանյանի անվան Պետական տիկնիկային թատրոնի մոտից
մասնակիցները եւ թատերախմբերը դիմակներով եւ տոնական զգեստներով
զարդարված կշարժվեն Աբովյան փողոցով դեպի Հանրապետության հրապարակ,
ապա նաեւ` մանկական այգի, ուր եւ կանցկացվի տոնական համերգ`
թատերական ներկայացումներով: