16 ՀԱՅ ԱՐՎԵՍՏԱԳԵՏՆԵՐ ՊԱՐԳԵՎԱՏՐՎԵՑԻՆ ԹԱԹԱՐՍՏԱՆԻ ՄՇԱԿՈՒՅԹԻ
ՆԱԽԱՐԱՐՈՒԹՅԱՆ ՀՈՒՇԱՄԵԴԱԼՆԵՐՈՎ ԵՎ ՊԱՏՎՈԳՐԵՐՈՎ
29-09-2005 18:25:00 | Հայաստան | Մշակույթ
ԵՐԵՎԱՆ, 29 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Կազան քաղաքի
1000-ամյակին նվիրված դեկորատիվ-կիրառական արվեստի ցուցահանդեսին
մասնակցած 16 հայ արվեստագետներ սեպտեմբերի 29-ին Սերգեյ
Փարաջանովի տուն-թանգարանում պարգեւատրվեցին Թաթարստանի մշակույթի
նախարարության հուշամեդալներով եւ պատվոգրերով: Պարգեւները
հանձնեցին հատուկ այդ առիթով Երեւան ժամանած Կազան քաղաքի
մշակույթի բաժնի վարիչ Արկադի Կարբաեւը եւ Կազանի հայ համայնքի
պատասխանատու Միքայել Խաչատրյանը:
Արկադի Կարբաեւի խոսքերով, հայ վարպետների գործերն իրենց
ուրույն տեղն են ունեցել կազանյան ցուցահանդեսում: «Արվեստի համար
սահմաններ երբեք էլ չեն եղել, առավել եւս այսօր, երբ ԱՊՀ բոլոր
ժողովուրդներն ունեն անկախ կարգավիճակ եւ համագործակցության լայն
հնարավորություններ: Հայկական կողմի մասնակցությունը մեծ ներդրում
էր Կազանի 1000-ամյակի հոբելյանին»,- ընդգծեց նա:
Կարբաեւը նշեց, որ հայերը Թաթարստանում հաստատվել են շատ վաղ
ժամանակաշրջանում, ինչի վկայությունը 1830-ականներին Կազանի
համալսարանում բացված հայագիտության ամբիոնն է, որի առաջին
ղեկավարը հրապարակախոս Ստեփանոս Նազարյանն է եղել:
Կազանի մշակույթի բաժնի վարիչը հայտնեց, որ ինքը հանդիպել է
նաեւ Հայաստանի մշակույթի նախարարի հետ, եւ նախնական
պայմանավորվածության համաձայն, Հայաստանի եւ Թաթարստանի միջեւ
շուտով կսկսվի մշակութային համագործակցություն:
Ներկայումս Թաթարստանում ապրում են մոտ 7000 հայեր, որոնք
ակտիվորեն մասնակցում են երկրամասի տնտեսական գործընթացներին ու
մշակութային կյանքին: