ՀԱՅԱՍՏԱՆԻ ՇԱԽՄԱՏԻՍՏՆԵՐՆ ԻՐԵՆՑ ՀՆԱՐԱՎՈՐՈՒԹՅՈՒՆՆԵՐԻՑ ՑԱԾՐ
ՀԱՆԴԵՍ ԵԿԱՆ ԵՎՐՈՊԱՅԻ ԹԻՄԱՅԻՆ ԱՌԱՋՆՈՒԹՅՈՒՆՈՒՄ
08-08-2005 17:44:00 | Հայաստան | Սպորտ
ԳՅՈԹԵԲՈՐԳ, 8 ՕԳՈՍՏՈՍԻ, ՆՈՅՅԱՆ ՏԱՊԱՆ: Շվեդիայի Գյոթեբորգ
քաղաքում ավարտվեց շախմատի Եվրոպայի 15-րդ թիմային առաջնությունը,
որին տղամարդկանց 40 եւ կանանց 26 հավաքականներ էին մասնակցում:
Մրցումներն անցկացվում էին շվեյցարական մրցակարգով, 9 տուրով: Այս
առաջնությունում առաջին անգամ միավորների հաշվարկման նոր կարգ
կիրառվեց. թիմային հաղթանակի համար տրվում էր 2, ոչ-ոքիի համար` 1
միավոր:
Իննօրյա պայքարի արդյունքում Եվրոպայի չեմպիոններ դարձան
Հոլանդիայի տղամարդկանց եւ Լեհաստանի կանանց հավաքականները:
Հայաստանի տղամարդկանց հավաքականն իր հնարավորություններից
ցածր հանդես եկավ: Թիմի անդամների վարկանիշներով Հայաստանը 4-րդն
էր եւ առաջնության ֆավորիտներից մեկն էր համարվում, սակայն թիմի
անհավասար մրցելույթները (4 հաղթանակ, 2 ոչ-ոքի, 3 պարտություն)
հնարավորություն չտվեցին բարձր տեղ գրավել: Հայաստանի տղամարդկանց
հավաքականը 10 միավորով բաժանեց 12-20-րդ տեղերը, իսկ լրացուցիչ
գործակիցների շնորհիվ գրավեց 12-րդ տեղը:
Ավելի հաջող էր Հայաստանի կանանց հավաքականի արդյունքը: Հայ
շախմատիստուհիները վաստակեցին 11 միավոր եւ Ուկրաինայի ու
Ռումինիայի մարզուհիների հետ բաժանեցին 5-7-րդ տեղերը:
Գործակիցներով նրանք զբաղեցրին 6-րդ տեղը:
Հայաստանի 2 շախմատիստներ` Աշոտ Անաստասյանն ու Լիլիթ
Գալոյանը, մրցանակների արժանացան պահեստային խաղացողների
հաշվարկում բարձր արդյունքներ ցույց տալու համար: Անաստասյանը 7
հնարավորից 5 միավորով 3-րդն էր, իսկ Գալոյանը 8 հնարավորից 7
միավորով` 2-րդը: