ԵՎՐՈՊԱՅԻ ԹԻՄԱՅԻՆ ԱՌԱՋՆՈՒԹՅԱՆ 5-ՐԴ ՏՈՒՐՈՒՄ ՀԱՅԱՍՏԱՆԻ
ՇԱԽՄԱՏԻՍՏՆԵՐԸ ՀԱՂԹԵՑԻՆ ԽՈՇՈՐ ՀԱՇՎՈՎ
04-08-2005 20:26:00 | Հայաստան | Սպորտ
ԳՅՈԹԵԲՈՐԳ, 4 ՕԳՈՍՏՈՍԻ, ՆՈՅՅԱՆ ՏԱՊԱՆ: Գյոթեբորգում ընթացող
շախմատի Եվրոպայի թիմային առաջնության 5-րդ տուրում Հայաստանի
տղամարդկանց հավաքականը 3,5-0,5 հաշվով հաղթեց Սերբիա-Չեռնոգորիայի
թիմին: Վլադիմիր Հակոբյանը, Սմբատ Լպուտյանը եւ Աշոտ Անաստասյանն
իրենց պարտիաները շահեցին, եւ միայն Լեւոն Արոնյանը ոչ-ոքի խաղաց:
Այս հաղթանակից հետո Հայաստանի շախմատիստները վաստակել են 7 միավոր
եւ բաժանում են 5-11-րդ տեղերը: Մրցապայքարը գլխավորում են
Իսրայելի եւ Ֆրանսիայի հավաքականները, որոնք 9-ական միավոր ունեն:
Եվրոպայի առաջնության 5-րդ տուրում կրկին անհաջողության
մատնվեց Հայաստանի կանանց հավաքականը, որը 1,5-2,5 հաշվով
պարտություն կրեց Հունաստանի հավաքականից: Միայն Լիլիթ Գալոյանը
կարողացավ հաղթել մրցակցուհուն: Էլինա Դանիելյանը ոչ-ոքի խաղաց,
իսկ Լիլիթ Մկրտչյանն ու Նելլի Աղինյանը պարտվեցին իրենց
մրցակցուհիներին: Այդպիսով Հայաստանի շախմատիստուհիներն ավելի
նահանջեցին մրցաշարային աղյուսակում եւ այժմ 4 միավորով բաժանում
են 17-21-րդ տեղերը:
Միանձնյա առաջատարը Լեհաստանի կանանց հավաքականն է, որը 9
միավոր է վաստակել: Առաջնության ավարտին մնացել է 4 տուր: