ԴՈՆԻ ՌՈՍՏՈՎ, 11 ՄԱՅԻՍԻ, ՆՈՅՅԱՆ ՏԱՊԱՆ: Արդեն մի քանի տարի Դոնի Ռոստովում անցկացվում են հունահռոմեական ոճի ըմբշամարտի պատանեկան միջազգային մրցումներ, որտեղ խաղարկվում են անվանի մարզիկներ Սամուրղաշեւ եղբայրների մրցանակները: Այս տարվա մրցումներում Հայաստանի ներկայացուցիչները հաջող հանդես եկան. 9 երկրների 180 մարզիկների մրցապայքարում նրանք 4 մրցանակ շահեցին: Առավել հաջող էր գյումրեցի Տիգրան Գեւորգյանի մրցելույթը: 46 կգ քաշային կարգում նա պարտության մատնեց իր բոլոր մրցակիցներին եւ գրավեց առաջին տեղը: 3-րդ մրցանակակիրներ դարձան երեւանցիներ Նորայր Խաչատրյանը, Հովհաննես Վարդերեսյանը եւ Սարգիս Տոնոյանը: Հաղթողներին պարգեւներ հանձնողների թվում էր նաեւ աշխարհի եւ օլիմպիական խաղերի բազմակի չեմպիոն Վարդերես Սամուրղաշեւը:

---