ԿԻՊՐՈՍԻ ԹՈՒՐՔԱԿԱՆ ՕԿՈՒՊԱՑՄԱՆ ԳՈՏՈՒՄ ԳՏՆՎՈՂ ՀԱՅԿԱԿԱՆ ՍԲ.
ՄԱԿԱՐ ՊԱՏՄԱԿԱՆ ՎԱՆՔԸ ՎԵՐԱԾՎԵԼ Է ՍՐՃԱՐԱՆԻ
10-05-2005 18:00:00 | Հայաստան | Մշակույթ
ԵՐԵՎԱՆ, 10 ՄԱՅԻՍԻ, ՆՈՅՅԱՆ ՏԱՊԱՆ: Վերջերս Կիպրոսի
հյուսիսում, թուրքական օկուպացման գոտում, Կիրենիայի լեռնային
հատվածում գտնվող հայկական Սբ. Մակար պատմական վանքը վերածվել Է
«կաֆետերիայի»:
ՀՀ ԱԳՆ մամուլի եւ տեղեկատվության վարչությունից «ՆՈՅՅԱՆ
ՏԱՊԱՆ»-ին տրամադրված հաղորդագրության համաձայն, Հյուսիսային
Կիպրոսում հրատարակվող թուրքական «Յենիդուզեն» թերթի ապրիլի 17-ի
համարում նշվում է, որ սրճարանի վերածված հայկական Սբ. Մակարավանքի
ներկայիս տեր ոմն Դերվիշ Սոնմեզլերը մտադիր է այն վերածել
հյուրանոցի:
Սբ. Մակարը հիմնադրվել է դեռեւս 4-րդ դարում ղպտիների կողմից,
սակայն հետագայում անցել է հայերին եւ դարեր շարունակ եղել է
հայկական սրբավայրերից մեկը: Լինելով Անթիլիասի կաթողիկոսության
իրավասության ներքո` Սբ. Մակարավանքը սերտ հարաբերություններ է
պահպանել նաեւ Սբ. Էջմիածնի հետ: Մինչեւ Կիպրոսի հյուսիսային մասի
թուրքական օկուպացիան եկեղեցին Կիպրոսի հայ համայնքի սիրված
վայրերից մեկն էր, սակայն այժմ լքված է եւ անմատչելի է քրիստոնյա
հավատացյալների համար:
Եկեղեցու ձեռագիր մատյաններն ու սրբապատկերները թալանվել ու
վաճառվել են, եւ միայն Կիպրոսի Հանրապետության, հայ եկեղեցու եւ
միջազգային կառույցների համատեղ ջանքերի շնորհիվ հնարավոր է եղել
կանխել միջազգային իրավունքի հիշյալ կոպիտ ոտնահարումը: