ՀԱՅԱՍՏԱՆԻ ՇԱԽՄԱՏԻՍՏՆԵՐԸ ՄՈՍԿՈՎՅԱՆ ՄՐՑԱՇԱՐԻ ԱՌԱՋԱՏԱՐՆԵՐԻ
ԹՎՈՒՄ ԵՆ
21-02-2005 19:50:00 | Ռուսաստան | Սպորտ
ՄՈՍԿՎԱ, 21 ՓԵՏՐՎԱՐԻ, ՆՈՅՅԱՆ ՏԱՊԱՆ: Մոսկվայում շարունակվում
է շախմատի միջազգային խոշոր մրցաշարը` «Աէրոֆլոտի» մրցանակների
խաղարկությունը: 4 խմբով ընթացող մրցումների «A-1» եւ «A-2»
խմբերում 6-ական տուր է անցկացվել:
Բարձրագույն` «A-1», խմբում առջեւում են Էմիլ Սուտովսկին
(Իսրայել) եւ Անդրեյ Խառլովը (Ռուսաստան), որոնք 5-ական միավոր են
վաստակել: Հայաստանի շախմատիստներից լավագույն արդյունքն ունի
Վլադիմիր Հակոբյանը. նա 4 միավորով գտնվում է առաջատարների խմբում:
Հաջող են խաղում նաեւ Աշոտ Անաստասյանը, Լեւոն Արոնյանը, Տիգրան
Լ.Պետրոսյանը: «A-2» խմբում միանձնյա առաջատարը չինացի Վանգ Հաոն
է, որը 5 միավոր ունի: 10 շախմատիստներ նրանից ետ են մնում կես
միավորով: 2-11-րդ տեղերը բաժանող մասնակիցների թվում է նաեւ Արսեն
Եղիազարյանը:
«B» եւ «C» խմբերում 7-ական տուր է անցկացվել: «B» խմբում շատ
հաջող է հանդես գալիս հայաստանցի պատանի շախմատիստ Զավեն
Անդրեասյանը: Նա ունի 6 միավոր եւ բաժանում է 1-3-րդ տեղերը: «C»
խմբում լավ արդյունքներ ունեն Երվանդ Հովհաննիսյանը, Աղասի Ինանցը,
Լիլիթ Գալոյանը:
Մրցաշարի բոլոր խմբերում 9 տուր է անցկացվելու: Հաղթողները
հայտնի կդառնան փետրվարի 23-ին: