«ՆԱՆԵ» ՇՈՈՒ-ԲԱԼԵՏԱՅԻՆ ԽՈՒՄԲԸ ԲԵՌԼԻՆԻ «TANZOLYMP» ՄԻՋԱԶԳԱՅԻՆ
ՄՐՑՈՒՅԹՈՒՄ ԱՐԺԱՆԱՑԵԼ Է 2 ՈՍԿԵ ՄԵԴԱԼԻ
03-02-2005 17:10:00 | Հայաստան | Մշակույթ
ԵՐԵՎԱՆ, 3 ՓԵՏՐՎԱՐԻ, ՆՈՅՅԱՆ ՏԱՊԱՆ: Հունվարի 13-17-ը
Բեռլինում կայացած «Tanzolymp» միջազգային մրցույթում «Նանե»
շոու-բալետային խումբը արժանացել է 2 ոսկե մեդալի` «Դասական» եւ
«Ֆոլկ» պարային անվանակարգերում:
Ինչպես փետրվարի 3-ի ասուլիսում հայտնեց խմբի ղեկավար Նարինե
Տոպոլյանը, սա «Նանե» բալետային խմբի երկրորդ մրցանակն է. առաջին
անգամ խումբը գրան պրիի արժանացել է Սանկտ Պետերբուրգում կայացած
«Dance open» բալետի միջազգային մրցույթում:
«Tanzolymp» միջազգային մրցույթին մասնակցել են 22 երկրներից
600 պարային խմբեր: Ն. Տոպոլյանի խոսքերով, մրցակցությունը բարդ
էր, քանի որ մասնակից խմբերը հիմանականում եղել են աշխարհի
լավագույն պարային ակադեմիայի սաները: «Նանե» խմբի երկու անդամներ`
11-ամյա երկվորյակ քույրեր Դիանա եւ Քրիստինե Հայրապետյանները
ներկայացրել են 8 համար, այդ թվում Կոմիտասի «Կաքավիկը»: Խմբի
ղեկավարի խոսքերով, ժյուրիի նախագահ, ՌԴ ժողովրդական արտիստ
Վլադիմիր Վասիլեւը դրվատանքով է խոսել հայ երեխաների մասին:
Մրցույթի մասին, ըստ Ն. Տոպոլյանի, իրենք տեղեկացել են
կոլեգաներից, ինչից հետո դիմել են մի շարք կազմակերպությունների`
ակնկալելով ֆինանսական աջակցություն, սակայն դիմումները մնացել են
անպատասխան: Խումբը մեծ դժվարությամբ է կարողացել հավաքել
համապատասխան գումարը, որպեսզի Բեռլինի հեղինակավոր մրցույթում
ներկայացնի հայ արվեստը:
Ն. Տոպոլյանը տեղեկացրեց նաեւ, որ իրենք հրավերներ ունեն Նյու
Յորքից եւ Սանկտ Պետերբուրգից, սակայն ճանապարհածախս չունենալու
պատճառով մերժել են դրանք: