ՀՀ ՆԱԽԱԳԱՀԸ ՊԵՏԱԿԱՆ ՄՐՑԱՆԱԿՆԵՐ ՀԱՆՁՆԵՑ ԳՐԱԿԱՆՈՒԹՅԱՆ ԵՎ
ԱՐՎԵՍՏԻ ՈԼՈՐՏԻ ԳՈՐԾԻՉՆԵՐԻՆ
18-01-2006 16:15:00 | Հայաստան | Մշակույթ
ԵՐԵՎԱՆ, 18 ՀՈՒՆՎԱՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: ՀՀ
նախագահ Ռոբերտ Քոչարյանը հունվարի 18-ին պետական մրցանակներ
հանձնեց գրականության եւ արվեստի բնագավառի ստեղծագործողներին:
Երաժշտության բնագավառում 2005 թ. պետական մրցանակը հանձնվեց
Հրաչյա Մելիքյանին` «Եռակոնցերտ» ստեղծագործության համար,
կերպարվեստի բնագավառում պետական մրցանակ ստացավ քանդակագործ Գետիկ
Բաղդասարյանը` «Համո Սահյան» հուշարձանի համար, գրականության եւ
հրապարակախոսության բնագավառում պետական մրցանակը շնորհվեց
բանաստեղծ Հենրիկ Էդոյանին` «3 օր առանց ժամանակի» գրքի համար:
Գրականության եւ հրապարակախոսության ոլորտների հանձնախմբի
նախագահ, Հայաստանի Գրողների միության Լեւոն Անանյանը հայտարարեց,
որ Հայաստանում հաղթահարվել է հրատարակչական ճգնաժամը: Վերջին մի
քանի տարիներին տարեկան Հայաստանում հրատարակվում է շուրջ 1500
անուն գիրք, դրանց մեկ երրորդը կազմում է գեղարվեստական
գրականությունը` ներառյալ հրապարակախոսությունը:
2005 թ. պետական մրցանակներ չշնորհվեցին ճարտարապետության եւ
քաղաքաշինության, թատերական եւ կինոարվեստի բնագավառներում:
Մրցանակների հանձնման պաշտոնական արարողության ավարտին ՀՀ
նախագահ Ռոբերտ Քոչարյանը շնորհակալություն հայտնեց հանձնախմբերին
խստապահանջության համար: Ըստ նրա, պետական մրցանակի պետք է արժանան
ինքնատիպ, նոր խոսք ասած ստեղծագործողները, հակառակ դեպքում
կարժեզրկվի պետական մրցանակը: Ի պատասխան անվանակարգերի շրջանակը
ընդլայնելու առաջարկի` ՀՀ նախագահը նշեց, որ գուցե իմաստ ունի
քննարկել որոշ ոլորտներում ոչ թե տարին մեկ, այլ երկու տարին մեկ
անգամ մրցանակներ շնորհելու հարցը: Ըստ Ռոբերտ Քոչարյանի, փոքր
երկրում դժվար է մեկ տարում գտնել մրցանակի արժանի աշխատանք,
օրինակ` ճարտարապետության բնագավառում: ՀՀ նախագահը դիմեց
հանձնախմբերին` անվանակարգերի կամ մրցանակների ներկայացվելիք
աշխատանքների ժամկետը ընդլայնելու վերաբերյալ առաջարկներ
ներկայացնել, որոնք կքննարկվեն եւ որոշումներ կկայացվեն: