ՀՀ ՄԱՐԴՈՒ ԻՐԱՎՈՒՆՔՆԵՐԻ ՊԱՇՏՊԱՆԸ ԴԻՄԵԼ Է ՍԱՀՄԱՆԱԴՐԱԿԱՆ
ԴԱՏԱՐԱՆ
23-12-2005 21:00:00 | Հայաստան | Հասարակություն
ԵՐԵՎԱՆ, 23 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: ՀՀ մարդու իրավունքների
պաշտպան Լարիսա Ալավերդյանը դիմել է ՀՀ Սահմանադրական դատարան`
խնդրելով քննել Երեւանի կենտրոնում կառուցապատում իրականացնելու
վերաբերյալ կառավարության որոշումների ՀՀ Սահմանադրությանը
համապատասխանելու հարցը: Այս մասին նա հայտնեց լրատվամիջոցների եւ
հասարակայնության ներկայացուցիչների հետ դեկտեմբերի 23-ի
հանդիպմանը:
Դիմումում, մասնավորապես, ասված է. «ՀՀ կառավարության
2001-2005թ. ընդունած վիճարկվող որոշումներով սահմանվել են Երեւան
քաղաքում քաղաքացիների անշարժ գույքի սեփականության պետական
կարիքների համար հարկադիր օտարման կոնկրետ գոտիներ, այդ գույքի
օտարման կարգն ու պայմանները: Կառավարության այդ որոշումներով
սահմանված պայմաններով ընթացել եւ ընթանում է Երեւան քաղաքում
քաղաքացիների անշարժ գույքի հարկադիր օտարումը, սեփականատերերի հետ
ընթացած դատական վեճերը լուծելիս դատարանները հենվել են ՀՀ
կառավարության այդ որոշումների վրա»: Ըստ Լ.Ալավերդյանի, քանի որ
խոսքը վերաբերում է մարդու` ՀՀ Սահմանադրությամբ երաշխավորված
սեփականության իրավունքի պահպանմանն ու պաշտպանությանը, հարկ է
առաջացել որոշելու ՀՀ կառավարության տվյալ հարցին վերաբերող
որոշումների սահմանադրականության հարցը:
ՀՀ օմբուդսմանի դիմումում թվարկված են կառավարության
որոշումները, որոնք, ըստ դիմումատուի, հակասում են ՀՀ
Սահմանադրության 5-րդ հոդվածի 2-րդ մասով, 31-րդ հոդվածի 1-ին,
2-րդ եւ 3-րդ մասերով, 85-րդ հոդվածի 2-րդ մասով ամրագրված
սկզբունքներին, ինչպես նաեւ ՀՀ Սահմանադրական դատարանի «Ազգային
ժողովի կողմից 1995թ. դեկտեմբերի 27-ին ընդունած «Անշարժ գույքի
մասին» Հայաստանի Հանրապետության օրենքի 22-րդ հոդվածի 2-րդ, 3-րդ,
4-րդ եւ 5-րդ մասերի` Հայաստանի Հանրապետության Սահմանադրության
8-րդ հոդվածին եւ 28-րդ հոդվածի 2-րդ մասին համապատասխանության
հարցը որոշելու վերաբերյալ գործով» 27.02.98թ. որոշմանը: