ԴԵԿՏԵՄԲԵՐԻ 14-ԻՆ ԿԱՄՓՈՓՎԵՆ ԱԶԳԱՅԻՆ ԵՐԱԺՇՏԱԿԱՆ ԵՐՐՈՐԴ
ՄՐՑԱՆԱԿԱԲԱՇԽՈՒԹՅԱՆ ԱՐԴՅՈՒՆՔՆԵՐԸ
24-11-2005 15:50:00 | Հայաստան | Մշակույթ
ԵՐԵՎԱՆ, 24 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Ալեքսանդր Սպենդիարյանի
անվան Օպերայի եւ բալետի ազգային ակադեմիական թատրոնում դեկտեմբերի
14-ին կամփոփվեն Ազգային երաժշտական երրորդ մրցանակաբաշխության
արդյունքները եւ կհանձնվեն մրցանակները: Ինչպես «ՆՈՅՅԱՆ ՏԱՊԱՆ»-ի
թղթակցին հայտնեց մրցանակաբաշխության համակարգող Նանա Տոնոյանը,
արդեն ավարտվել է օգոստոսից երգիչների, խմբերի ներկայացրած հայտերի
ընտրությունը:
Այս տարի մրցանակներ կհանձնվեն հետեւյալ 12 անվանակարգերում`
«Լավագույն դուետ», «Լավագույն երաժշտական խումբ», «Լավագույն
ալբոմ», «Լավագույն տեսահոլովակ», «Լավագույն գործիքավորող»,
«Տարվա հայտնություն», «Լավագույն աշխատանք արտերկրում», «Տարվա
ոճ», «Հայ փոփի ապագա», «Լավագույն երաժշտական նախագիծ»,
«Լավագույն երգչուհի», «Լավագույն երգիչ»: Հանձնվելու են նաեւ 3
հատուկ եւ Տիգրան Նաղդալյանի անվան մրցանակներ:
Ն. Տոնոյանը հայտնեց, որ քվեարկությունն անցկացնում է
60-հոգանոց կազմով ժյուրին, որում ընդգրկված են ռեժիսորներ,
արվեստի բնագավառի ներկայացուցիչներ, ինչպես նաեւ քաղաքական
գործիչներ: Ներկայումս www.armtv.com հասցեով ընթանում է
ինտերնետային քվեարկություն:
Մրցանակների բաշխման արարողությունը ուղիղ եթերով կհեռարձակվի
Հայաստանի Հանրային հեռուստատեսությամբ: Համերգը կվարեն հայտնի
դերասան Ռաֆայել Քոթանջյանը եւ «Միսս Եվրոպա» գեղեցկության եւ
նրբագեղության մրցույթում «Վիցե Միսս» տիտղոսին արժանացած Լուսինե
Թովմասյանը: