ՏԱՐԵՍԿԶԲԻՑ
ՀԱՅԱՍՏԱՆՈՒՄ ՍՊԱՌՈՂԱԿԱՆ ԳՆԵՐԸ 4,9%-ՈՎ ԱՃԵԼ ԵՆ
31-10-2008 14:04:00 | Հայաստան | Տնտեսություն
ԵՐԵՎԱՆ, 31 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Հայաստանում սպառողական
գների ինդեքսը 2008թ.-ի հոկտեմբերին 2007թ.-ի դեկտեմբերի համեմատ
կազմել է 104,9%, այդ թվում, պարենային ապրանքներինը (ներառյալ
ոգելից խմիչք եւ ծխախոտ) 102,7%, ոչ պարենային ապրանքներինը`
104,4%, իսկ ծառայությունների սակագներինը` 109,5%:
ՀՀ Ազգային վիճագրական ծառայության տվյալներով, 2008թ.-ի
հոկտեմբերին սեպտեմբերի համեմատ ՀՀ սպառողական շուկայում
արձանագրվել է 0,7% գնաճ, ընդ որում, սեպտեմբեր-հոկտեմբերին
ընդհանուր գնաճը կազմել է 1,2%: Պարենային ապրանքների (ներառյալ
ոգելից խմիչք եւ ծխախոտ) գները 2008թ.-ի հոկտեմբերին սեպտեմբերի
համեմատ աճել են 1,6%-ով, իսկ ոչ պարենային ապրանքների շուկայում
եւ ծառայությունների ոլորտում գրանցվել է գների եւ սակագների,
համապատասխանաբար, 0,8% եւ 0,2% գնանկում:
2008թ.-ի հունվար-հոկտեմբերին սպառողական գների միջին ամսական
հավելաճը կազմել է 0,5%, ինչը 0,2 տոկոսային կետով գերազանցել է
նախորդ տարվա նույն ժամանակահատվածում գրանցված համապատասխան
ցուցանիշը (0,3%):
2008թ.-ի հոկտեմբերին 2007թ.-ի հոկտեմբերի համեմատ սպառողական
գների ինդեքսը կազմել է 108,6%, այդ թվում պարենային ապրանքներինը
(ներառյալ ոգելից խմիչք եւ ծխախոտ)` 108,3%, ոչ պարենային
ապրանքներինը` 106,5%, ծառայությունների սակագներինը` 110,3%, իսկ
հունվար-հոկտեմբերին 2007թ.-ի հունվար-հոկտեմբերի համեմատ,
համապատասխանաբար, 109,6%, 111,2, 105,8 եւ 108,6%: