ՏՈԿԻՈ, 9 ՀՈՒՆՎԱՐԻ, ՆՈՅՅԱՆ ՏԱՊԱՆ: Իր պարտականություններն
ստանձնող Կոսովոյի նոր վարչապետ Հաշիմ Տաչին համարում է, որ
Սերբիայից այդ երկրամասի անկախությունը միակողմանի կարգով կհռչակվի
արդեն փետրվարի առաջին կեսին: Նա այդ մասին հայտարարել է ճապոնական
«Ասախի» թերթին տված հարցազրույցում, հաղորդում է ԻՏԱՌ-ՏԱՍՍ-ը:
«Մենք այլեւս չենք կարող ձգձգել անկախությունը: Դա տեղի
կունենա չորս-հինգ շաբաթվա ընթացքում»,- ասել է Տաչին:
«Մեր կառավարությունը ձգտում է անկախության որպես
ժողովրդավարական ինքնիշխան պետություն` ԱՄՆ-ի եւ Եվրոպական
միության հետ գործողությունների լիակատար կոորդինացման հիման վրա:
Միացյալ Նահանգները եւ ԵՄ երկրները անհապաղ կճանաչեն մեր
անկախությունը»,- ավելացրել է նա:
Սպասվում է, որ այսօր Կոսովոյի խորհրդարանը կհաստատի Տաչիի
գլխավորած նոր կառավարության կազմը, որը գլխավորում է Դեմոկրատական
կուսակցությունը: Վերջինս հաղթել էր անցած տարվա նոյեմբերին
երկրամասում տեղի ունեցած ընտրություններում: