«ՀԱՅԱՍՏԱՆԻ ՓՈՔՐԻԿ ԵՐԳԻՉՆԵՐԸ» ՀՈԲԵԼՅԱՆԱԿԱՆ ՀԱՄԵՐԳՈՎ ԿՆՇԵՆ
ԻՐԵՆՑ 15-ԱՄՅԱԿԸ
20-12-2007 19:15:00 | Հայաստան | Մշակույթ
ԵՐԵՎԱՆ, 20 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Երեւանի «Արամ
Խաչատրյան» համերգասրահում դեկտեմբերի 21-ին կկայանա «Հայաստանի
փոքրիկ երգիչներ»-ի հոբելյանական համերգը` նվիրված երգչախմբի
15-ամյակին: Ինչպես դեկտեմբերի 20-ի ասուլիսում հայտնեց երգչախմբի
հիմնադիր, գեղարվեստական ղեկավար եւ գլխավոր դիրիժոր Տիգրան
Հեքեքյանը, համերգի ժամանակ հանդես կգան նաեւ երգչախմբի նախկին
սաները:
«Մեր երգչախումբը մեր պետության տարիքին է, եւ մենք մշտապես
մտածում ենք ոչ միայն էլ ավելի կատարելագործվել, այլեւ Հայաստանը
ներկայացնել միջազգային բեմերում»,- ասաց Տ.Հեքեքյանը:
ՀՀ մշակույթի փոխնախարար Կարինե Խոդիկյանը հայտնեց, համերգի
ավարտին երգչախմբային արվեստում ունեցած նվաճումների եւ 15-ամյակի
կապակցությամբ երգչախումբը կպարգեւատրվի ՀՀ Մշակույթի
նախարարության պատվոգրով: Երգչախմբի ստեղծման եւ կայացման գործում
ունեցած վաստակի համար ՀՀ արվեստի վաստակավոր գործիչ, ռեժիսոր,
մանկավարժ Էլմիրա Հեքեքյանը կպարգեւատրվի նախարարության ոսկե
մեդալով:
«Հայաստանի փոքրիկ երգիչներ» երգչախումբը մասնակցել է
բազմաթիվ փառատոների, միջազգային մրցույթների, համերգներով հանդես
է եկել ԱՄՆ-ի եւ եվրոպական շատ քաղաքների հեղինակավոր բեմերում:
Երգչախմբի երգացանկում ընգրկված են միջնադարյան, Վերածննդի շրջանի
եւ ժամանակակից գործեր: