ԱՅՍ ՏԱՐՎԱ ՀՈՒՆՎԱՐ-ՀՈԿՏԵՄԲԵՐԻՆ 2006 Թ.-Ի ՆՈՒՅՆ
ԺԱՄԱՆԱԿԱՀԱՏՎԱԾԻ ՀԱՄԵՄԱՏ ՀՀ ՊԱՇՏՊԱՆԱԿԱՆ ԾԱԽՍԵՐԻ ԾԱՎԱԼԸ 30,6%-ՈՎ
ԱՃԵԼ Է
11-12-2007 20:00:00 | Հայաստան | Տնտեսություն
ԵՐԵՎԱՆ, 11 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: 2007թ.-ի
հունվար-հոկտեմբերին կատարված 437 մլրդ 806,4 մլն դրամ (ավելի քան
1 մլրդ 256,6 մլն ԱՄՆ դոլար) բյուջետային ծախսերից 79 մլրդ 769 մլն
դրամի ծախսը կատարվել է պաշտպանության բնագավառում, ինչը 30,6%-ով
գերազանցում է նախորդ տարվա նույն ժամանակահատվածի ցուցանիշը:
Պաշտպանական ծախսերի հարաբերակցությունը ՀՀ ՀՆԱ-ի նկատմամբ նախորդ
տարվա առաջին տասն ամիսների 3%-ից այս տարվա նույն
ժամանակահատվածում հասել է 3,3%-ի:
ՀՀ Ազգային վիճակագրական ծառայության տվյալներով, 2007թ.-ի
առաջին տասն ամիսներին հասարակական կարգի պահպանության, ազգային
անվտանգության ու արդարադատության ոլորտներում կատարված
բյուջետային ծախսերը կազմել են 36 մլրդ 63,8 մլն դրամ, ինչը նախորդ
տարվա նույն ժամանակահատվածի ցուցանիշը գերազանցում է 19,5%-ով:
Դրանց հարաբերակցությունը ՀՆԱ-ի նկատմամբ նախորդ տարվա առաջին տասն
ամիսների համեմատ չի փոփոխվել եւ կազմել է 1,5%:
Կրթության եւ գիտության ոլորտում կատարված ծախսերը կազմել են
69 մլրդ 714,3 մլն դրամ (նախորդ տարվա հունվար-հոկտեմբերի համեմատ
աճը կազմել է 22,7%), իսկ դրանց հարաբերակցությունը ՀՆԱ-ի նկատմամբ
2,8%-ից հասել է 2,9%-ի: Սոցիալական ապահովագրության եւ սոցիալական
ապահովության ոլորտներում ծախսվել է 51 մլրդ 74,9 մլն դրամ (աճը`
19,2%), որի հարաբերակցությունը ՀՆԱ-ի ծավալին մնացել է անփոփոխ եւ
կազմել 2,1%, իսկ առողջապահության ոլորտում` 33 մլրդ 726,6 մլն
դրամ (աճը` 24,3%), որի հարաբերակցությունը ՀՆԱ-ին 2006թ.-ի
հունվար-հոկտեմբերի 1,3%-ից այս տարվա նույն ժամանակահատվածում
աճել է մինչեւ 1,4%:
2007թ.-ի հունվար-հոկտեմբերին տրանսպորտի, ճանապարհային
տնտեսության եւ կապի ոլորտում ծախսվել են 32 մլրդ 655,6 մլն դրամի
միջոցներ, որոնք նախորդ տարվա նույն ամիսների համեմատ աճել են
30,5%-ով: Այդ ծախսերի եւ ՀՆԱ-ի հարաբերակցությունը 2006թ.-ի
հունվար-հոկտեմբերի 1,2%-ից այս տարվա նույն ժամանակահատվածում
նվազել է մինչեւ 1,4%: