ԲՐԻՏԱՆԱՑԻ ԽՈՐՀՐԴԱՐԱՆԱԿԱՆՆԵՐԸ ՀԱՅՏԱՐԱՐԵԼ ԵՆ ՌՈՒՍԱՍՏԱՆԻ ՀԵՏ
ՀԱՐԱԲԵՐՈՒԹՅՈՒՆՆԵՐԻ ԲԱՐԵԼԱՎՄԱՆ ԱՆՀՐԱԺԵՇՏՈՒԹՅԱՆ ՄԱՍԻՆ
26-11-2007 19:55:00 | | Միջազգային
ԼՈՆԴՈՆ, 26 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Բրիտանիացի
խորհրդարանականները Մեծ Բրիտանիայի կառավարությանը կոչ են անում
քայլեր ձեռնարկել Ռուսաստանի հետ հարաբերությունների բարելավման
ուղղությամբ:
Նոյեմբերի 25-ին հրապարակված Մեծ Բրիտանիայի խորհրդարանի
Համայնքների պալատի միջազգային գործերի հանձնաժողովի զեկույցում
կարծիք է արտահայտվում, որ բրիտանա-ռուսական կապերի բնույթի վրա
բացասական ազդեցություն են գործում նաեւ Վաշինգտոնի հետ Լոնդոնի
չափազանց սերտ հարաբերությունները:
Ռուսաստանը, պնդում են փաստաթղթի հեղինակները, համարում է, որ
Միացյալ Թագավորությունը չափազանց սերտ գործընկերական
հարաբերություններ ունի Միացյալ Նահանգների հետ եւ ամեն դեպքում
«թերահավատորեն է վերաբերվում ԱՄՆ-ի վրա որեւէ ազդեցություն
գործելու Մեծ Բրիտանիայի հնարավորություններին»:
Հանձնաժողովի խոստովանությամբ, բրիտանա-ռուսական
հարաբերություններում նյարդայնացնող է «Լիտվինենկոյի գործը»:
Համայնքների պալատի պատգամավորները կոչ են անում Մեծ Բրիտանիայի
կառավարությանը նոր բանակցություններ վարել ռուսական կողմի հետ այդ
գործով կասկածվողներին հանձնելու հարցի առնչությամբ: