ԿԱԶՈՆԻՆ ՀՈՒՍՈՎ Է, ՈՐ ՀԱՅԱՍՏԱՆԻ ՀԱՎԱՔԱԿԱՆԸ ԱՅՍ ԱՆԳԱՄ
ՀԱՋՈՂՈՒԹՅԱՆ ԿՀԱՍՆԻ
07-09-2004 18:30:00 | Հայաստան | Սպորտ
ԵՐԵՎԱՆ, 7 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Սեպտեմբերի 8-ին
ֆուտբոլի Հայաստանի ազգային հավաքականը կանցկացնի 2006թ.-ի աշխարհի
առաջնության ընտրական մրցաշարի իր 2-րդ հանդիպումը: Այդ օրը նա
Երեւանի «Հանրապետական» մարզադաշտում կընդունի Ֆինլանդիայի
հավաքականին:
Հայաստանի թիմը, ֆրանսիացի մարզիչներ Բեռնար Կազոնիի եւ
Բեռնար Պարդոյի գլխավորությամբ, այդ խաղին նախապատրաստվում է
սեպտեմբերի 3-ից: Մարզահավաքին մասնակցում են Հայաստանում եւ
արտերկրում հանդես եկող 19 ֆուտբոլիստներ, որոնցից էլ ի վերջո
ընտրություն կկատարվի: Խաղի նախորդ օրն անցկացված ասուլիսում
Հայաստանի հավաքականի գլխավոր մարզիչ Բ.Կազոնին նշեց, որ
ֆուտբոլիստներն այժմ ավելի լավ մարզավիճակում են, քան Մակեդոնիայի
հետ խաղի ժամանակ: Բնութագրելով Ֆինլանդիայի թիմին, Բ.Կազոնին
նշեց, որ այն ուժեղ կոլեկտիվ է` համալրված ֆիզիկական լավ
տվյալներով օժտված ֆուտբոլիստներով:
Նույն օրը` սեպտեմբերի 8-ին, Երեւանի «Նաիրի» մարզադաշտում
Հայաստանի երիտասարդական հավաքականը Եվրոպայի առաջնության ընտրական
խաղ կանցկացնի Ֆինլանդիայի երիտասարդականի հետ:
Հիշեցնենք, որ Հայաստանի 2 հավաքականներն էլ իրենց 1-ին
խաղերում զիջել էին Մակեդոնիայի թիմերին: Ազգային հավաքականը
պարտություն էր կրել 0-3 հաշվով, երիտասարդականը` 0-4 հաշվով: