ՀՈՒՆԻՍԻ 29-ԻՆ ԵՐԵՎԱՆՈՒՄ ՄԻԱՅՆ ՄԵԿ ՀԱՄԵՐԳՈՎ ՀԱՆԴԵՍ ԿԳԱ
ԱՄԵՐԻԿՅԱՆ ՀԱՆՐԱՀԱՅՏ «ՔՐՈՆՈՍ» ԴԱՍԱԿԱՆ ՔԱՌՅԱԿԸ
24-06-2004 16:10:00 | Հայաստան | Մշակույթ
ԵՐԵՎԱՆ, 24 ՀՈՒՆԻՍԻ, ՆՈՅՅԱՆ ՏԱՊԱՆ: Երեւանի «Արամ Խաչատրյան»
համերգասրահում միայն մեկ համերգով` հունիսի 29-ին, հանդես կգա
ամերիկյան «Քրոնոս» դասական քառյակը: «XXI-ի հեռանկարներ» 5-րդ
երաժշտական միջազգային փառատոնի շրջանակներում առաջին անգամ
Հայաստան ժամանող հանրահայտ քառյակի երեւանյան համերգը նախաձեռնել
է Հայաստանի երաժշտական ինֆորմացիոն կենտրոնը: Ինչպես «ՆՈՅՅԱՆ
ՏԱՊԱՆ»-ի թղթակցին հայտնեց փառատոնի գլխավոր մենեջեր Սոնա
Հովհաննիսյանը, «Քրոնոսի» հետ բանակցությունները սկսվել են դեռեւս
2001 թվականին, սակայն միայն վերջերս` այս տարվա գարնանը, ձեռք
բերվեց Հայաստանում համերգով հանդես գալու պայմանավորվածությունը:
Նշվեց, որ քառյակի հետ Երեւան կժամանեն լուսային եւ ձայնային
ռեժիսորներ ԱՄՆ-ից, որոնք կապահովեն բոլոր տեխնիկական խնդիրները:
Համերգին կատարվելիք բոլոր ութ գործերը հատուկ գրված են
«Քրոնոսի» համար կամ հեղինակված են քառյակի կողմից: Դրանցից մեկը
գրվել է NASA-ի պատվերով: NASA-ի կողմից տիեզերքում ձայնագրված
արեգակնային հնչյունները «Քրոնոսը» վեր է ածել երաժշտության: Ի
դեպ, Ս.Հովհաննիսյանը նշեց, որ քառյակի երաժիշտները կատարել են
երեք հայ կոմպոզիտորների` Աշոտ Զոհրաբյանի, Ավետ Տերտերյանի եւ
ամերիկահայ Տիգրան Թահմիզյանի, գործերից, որոնք նույնպես հատուկ
պատվիրված են եղել «Քրոնոսի» համար: «Մենք երկար ժամանակ բանակցում
էինք, որ քառյակը Երեւանում հայ կոմպոզիտորներից մեկի գործերից
կատարի, սակայն նրանք չհամաձայնվեցին»,- ասաց Ս.Հովհաննիսյանը:
Փառատոնի գլխավոր մենեջերի խոսքերով, քառյակի համերգների
տոմսերի գինը, սովորաբար, տատանվում է 200-1000 դոլարի
սահմաններում: Սակայն, հաշվի առնելով Հայաստանի ներկայիս
սոցիալ-տնտեսական վիճակը, երեւանյան համերգը լինելու է հիմնականում
մուտքի տոմսերով եւ հրավիրատոմսերով. կվաճառվեն միայն որոշակի
քանակույամբ տոմսեր, որոնց արժեքը կկազմի 3000-15000 դրամ: