ՉԱՐԵՆՑԻ ՏՈՒՆ-ԹԱՆԳԱՐԱՆՈՒՄ ԲԱՑՎԵԼ Է «ԵՐԿԻՐ ՆԱԻՐԻ» ՎԵՊԻ
ՆԿԱՐԱԶԱՐԴՈՒՄՆԵՐԻ ՑՈՒՑԱՀԱՆԴԵՍԸ
03-05-2004 17:00:00 | Հայաստան | Մշակույթ
ԵՐԵՎԱՆ, 3 ՄԱՅԻՍԻ, ՆՈՅՅԱՆ ՏԱՊԱՆ: Արդեն երկրորդ տարին է, ինչ
Հայաստանը մասնակցում է Ֆրանսիայի Մշակույթի նախարարության կողմից
մայիս ամսին կազմակերպվող միջազգային ակցիային, որին մասնակցում են
տարբեր երկրների թանգարաններ: «Պատմություն եւ պատմություններ»
խորագրով ակցիայի շրջանակներում մայիսի 2-ին Եղիշե Չարենցի
տուն-թանգարանում բացվեց Չարենցի «Երկիր Նաիրի» վեպի
նկարազարդումների ցուցահանդեսը: Ներկայացված են Մարտիրոս Սարյանի,
Արա Բեքարյանի, Յուրի Բաղդասարովի, Ռոբերտ Էլիբեկյանի եւ այլ հայ
արվաստագետների գրաֆիկական աշխատանքները:
Ըստ թանգարանի տնօրեն Լիլիթ Հակոբյանի, այդ աշխատանքները, որ
տարիներ շարունակ պահվել են թանգարանի պահոցներում, առաջին անգամն
են ցուցադրվում: Վեպի նկարազարդումներում ներկայացված են Կարսի
ամբողջական պատկերը, քաղաքի կենցաղը, պատմամշակութային կոթողները:
Լ.Հակոբյանը դրանցից հատկապես առանձնացրեց Մարտիրոս Սարյանի
նկարազարդումները, որոնցում, ըստ նրա, տրված է «Երկիր Նաիրի» վեպի
հերոսների տիպիկ նկարագիրը:
ՀՀ ԳԱԱ Մանուկ Աբեղյանի անվան գրականության ինստիտուտի տնօրեն
Ազատ Եղիազարյան խոսքերով, Չարենցի վեպը գեղարվեստական ինքնատիպ
մտածողության դրսեւորում է: Հեղինակը տիպականացման երգիծական
արտահայտչամիջոցներով եւ անսովոր հանգուցալուծումներով ներկայացրել
է ժամանակաշրջանի հասարակական-քաղաքական բարդ իրադարձությունները:
Ցուցահանդեսին ցուցադրվեց նաեւ ռեժիսոր Մարատ Վարժապետյանի
«Երկիր Նաիրի» ֆիլմը: