ՀԱՅԱՍՏԱՆԻ 4 ՁՅՈՒԴՈՅԻՍՏՆԵՐ ԿՄԱՍՆԱԿՑԵՆ ՄՈՍԿՈՎՅԱՆ ՄԻՋԱԶԳԱՅԻՆ
ՄՐՑԱՇԱՐԻՆ
22-01-2004 18:50:00 | Հայաստան | Սպորտ
ԵՐԵՎԱՆ, 22 ՀՈՒՆՎԱՐԻ, ՆՈՅՅԱՆ ՏԱՊԱՆ: Հունվարի 23-25-ը
Մոսկվայում կանցկացվի ձյուդո ըմբշամարտի միջազգային բարձրագույն`
«Ա» կարգի, մրցաշար, որին կմասնակցեն նաեւ Հայաստանի 4
ներկայացուցիչներ: Տղամարդկանց մրցապայքարում հանդես կգան Արմեն
Նազարյանը (60 կգ քաշային կարգ), Վարուժան Իսրայելյանը եւ Լեւոն
Գալստյանը (2-ն էլ` 73 կգ), կանանց մրցապայքարում` Քրիստինե
Նաջարյանը (57 կգ): Մոսկովյան մրցաշարը առանձնահատուկ է նրանով, որ
բարձր տեղեր զբաղեցրած մասնակիցները Աթենքի օլիմպիական խաղերի
վարկանիշային միավորներ կարող են ձեռք բերել:
Հայ ձյուդոյիստները մրցաշարին նախապատրաստվել են Ծաղկաձորում,
որտեղ ուսումնամարզական հավաք էր կազմակերպված: Թեեւ մոսկովյան
միջազգայինը շատ ուժեղ կազմ է ունենալու, մարզաձեւի հանրապետական
ֆեդերացիայի նախագահ Ալեքսան Ավետիսյանը հուսով է, որ հայ
մարզիկները կարող են հաջող հանդես գալ ու վարկանիշային միավորներ
վաստակել: