Ի պատիւ պետական այցով Ռուսաստանի Դաշնութիւնում գտնուող ՀՀ նախագահ Սերժ Սարգսեանի եւ տիկին Ռիտա Սարգսեանի, հոկտեմբերի 24-ին Ռուսաստանի Դաշնութեան նախագահ Դմիտրի Մեդուեդեւի եւ նրա տիկնոջ` Սուետլանայ Մեդուեդեւայի, անունից տրուել է պետական ճաշ: ՀՀ նախագահը մէկ անգամ եւս շնորհակալութիւն է յայտնել ջերմ եւ սրտաբաց ընդունելութեան համար, գոհունակութեամբ նշելով, որ այս այցը դարձաւ խորը պատմական հիմք ունեցող հայ-ռուսական բարեկամական յարաբերութիւններն էբլ աւելի ամրապնդելու անկեղծ հետաքրքրուածութեան եւս մէկ կարեւոր եւ նշանակալից դրսեւորում: «Անկեղծօրէն շնորհակալ եմ Ռուսաստանի Դաշնութեան ղեկավարութեանը` մեր բանակցութիւնների ընթացքում գործնական եւ կառուցողական տրամադրուածութեան, Հայաստանի եւ մեր ժողովրդի հասցէին բարձր գնահատականի եւ ջերմ խօսքերի համար»,- ասել է Սերժ Սարգսեանը` ընդգծելով, որ հայ-ռուսական փոխյարաբերութիւնների բազմադարեայ պատմութեան ողջ ընթացքում, չնայած դժուարութիւններին, զրկանքներին եւ փորձութիւններին, Հայաստանի եւ Ռուսաստանի ժողովուրդների միջեւ յարաբերութիւնները միշտ եղել են եղբայրութեան, անկեղծ յարգանքի եւ փոխադարձ աջակցութեան օրինակ: Ս.Սարգսեանը նշել է, որ երկու ժողովուրդների պատմական յիշողութեան մէջ կան քաղաքական, ռազմական եւ հումանիտար բարեկամութեան շատ փառաւոր աւանդոյթներ: «Մենք պարտաւոր ենք ոչ միայն խնամքով պահպանել այդ անգնահատելի ժանագութիւնը, այլ նաեւ միասին փնտրել համագործակցութեան յետագայ զարգացման նոր հնարաւորութիւններ: Դրանում եմ ես տեսնում Հայաստանի եւ Ռուսաստանի միջպետական յարաբերութիւնների հիմքը` իրական դաշնակցային եւ կառուցողական գործընկերային յարաբերութիւններ, որոնք ուղղուած են կայունութեան եւ անվտանգութեան պայմաններում մեր երկրների բարգաւաճմանն ու մեր ժողովուրդների բարեկեցութեանը»,- ասել է նա: Ընդգծելով, որ հաւատում է երկու երկրների համագործակցութեան հեռանկարին ու մեծ ներուժին, Սերժ Սարգսեանը, յոյս է յայտնել, որ այս այցն էբլ աւելի կ'ամրապնդի յետագայ բեղմնաւոր աշխատանքի ընդհանուր տրամադրուածութիւնը, կը բացի փոխգործակցութեան նոր սահմաններ: «Վստահ եմ, որ համատեղ ջանքերով մենք կը կարողանանք անել ամէն հնարաւորը`նախանշուած ծրագրերը կեանքի կոչելու համար»,-նշել է Հանրապետութեան ղեկավարը: Պետական ճաշի ժամանակ Սերժ Սարգսեանը Դմիտրի Մեդուեդեւին է յանձնել Հայաստանի բարձրագոյն պետական պարգեւը` Փառքի շքանշանը, որով ՌԴ նախագահը պարգեւատրուել է Հայաստանի եւ Ռուսաստանի ժողովուրդների միջեւ աւանդական բարեկամական կապերի ամրապնդման, Հայաստանի եւ Ռուսաստանի միջեւ դաշնակցային ռազմավարական յարաբերութիւնների խորացման ու ընդլայնման, ինչպէս նաեւ խաղաղութեան եւ միջազգային անվտանգութեան պաշտպանութեան գործում ներդրած անձնական մեծ աւանդի համար:

---