Ըստ ոստիկանութեան, բացայայտուել է խարդախութեան գործ` կասկածեալները լիբերիացիներ են
20-03-2012 15:57:52 | Հայաստան | Հասարակութիւն
Մարտի 19-ին ոստիկանութեան քրէական հետախուզութեան, կազմակերպուած յանցաւորութեան դէմ պայքարի գլխաւոր վարչութիւնների, Արմավիրի մարզային վարչութեան եւ Վաղարշապատի բաժնի ծառայողները, համատեղ օպերատիւ միջոցառումներ իրականացնելիս բերման են ենթարկել Լիբերիայի 3 քաղաքացիների`
1974 թ. ծնուած Ջորջ Զ.-ին, 1978 թ. ծնուած Ֆոստեր Գ.-ին եւ 1976 թ. ծնուած Մարկ Դ.-ին:
Ըստ ՀՀ ոստիկանութեան հասարակայնութեան հետ կապերի եւ լրատուութեան վարչութեան հաղորդագրութեան, պարզուել է, որ նրանք մարտի 17-ին Գեւորգ Կ.-ի վստահութիւնը չարաշահելով` նրանից խաբէութեամբ վերցրել են 4.000 ԱՄՆ դոլար գումար:
Մարտի 18-ին իբր յատուկ նիւթերով մաքրելով սեւ գոյնով ներկուած 2.000 ԱՄՆ դոլար թղթադրամն ու դրանք Գեւորգ Կ.-ին տալուց յետոյ պատճառաբանել են, որ մաքրող նիւթերը վերջացել են: Ապա նրանից փորձել են յափշտակել եւս 100.000 ԱՄՆ դոլար` իբր քիմիական նիւթեր ձեռք բերելու եւ մնացած թղթադրամները լուալու համար:
Փաստացի Գեւորգ Կ.-ից խաբէութեամբ յափշտակել են 2000 դոլար:
Ձեռնարկուած միջոցառումներով` յայտնաբերուել եւ առգրաւուել են թղթադրամների չափսով կտրտուած սեւ գոյնի թղթերը, այլ նիւթեր ու պարագաներ: Ոստիկանութեան Արմավիրի մարզի քննչական բաժնում յարուցուել է քրէական գործ ՀՀ քրէական օրէնսգրքի 178 յօդուածի 2-րդ մասի 1-ին եւ 2-րդ կէտերի եւ 34-178 յօդուածի 3-րդ մասի 1-ին կէտի յատկանիշներով: Կատարւում է նախաքննութիւն:
«Վերոյիշեալ անձանց գործողութիւններից տուժած քաղաքացիները կարող են դիմել ոստիկանութեան Վաղարշապատի կամ մօտակայ բաժին»,- նշւում է ոստիկանութեան հաղորդագրութեան մէջ: