Մոլդովայի բնապահպանութեան ոլորտի փորձագէտները ԵԱՀԿ աջակցութեամբ ուսումնասիրում էն բնապահպանական տեղեկատուութեան կենտրոնների փորձը Հայաստանում
28-10-2010 13:04:30 | Հայաստան | Հասարակութիւն
ԵՐԵՒԱՆ, 28 հոկտեմբերի, 2010թ. Մոլդովայի շրջակայ միջավայրի պահպանման փորձագէտները ուսումնասիրեցին բնապահպանական տեղեկատուութեան Օրհուս կենտրոնների հիմնադրման եւ գործունէութեան հայկական փորձը ԵԱՀԿ ջանքերով կազմակերպուած ուսումնասիրութեան այցի ընթացքում:
Մոլդովայի բնապահպանութեան նախարարութեան եւ մերձդնեստրեան շրջանի «Էկոսպեկտրում» հասարակական կազմակերպութեան ներկայացուցիչները այցելեցին Երեւանի, Դիլիջանի, Գաւառի եւ Հրազդանի բնապահպանական տեղեկատուութեան Օրհուս կենտրոնները: ԵԱՀԿ երեւանեան գրասենեակի աջակցութեամբ գործող այս կենտրոնները հանրութեանը տրամադրում էն շրջակայ միջավայրի մասին տեղեկատուութեան մատչելիութիւն եւ խթանում էն հասարակութեան մասնակցութիւնը շրջակայ միջավայրին առնչուող որոշումների կայացման գործընթացներում` Մակ-ի եւրոպական տնտեսական յանձնաժողովի Օրհուսի կոնուենցիայի համաձայն:
Հայաստանեան Օրհուս ցանցի, քաղաքացիական հասարակութեան անդամները եւ պետական մարմինների ներկայացուցիչները ներկայացրեցին Օրհուսի կոնուենցիայի իրագործման սեփական փորձը:
« Հանրային մասնակցութիւնը որոշումների կայացման գործընթացում ժողովրդավարութեան հիմնաքարերից է, եւ Օրհուսների ցանցը շրջակայ միջավայրի պահպանման ասպարէզում ժողովրդավարութեան խթանման արդիւնաւէտ գործիք է: Գոհունակութեամբ կարող եմ նշել, որ Հայաստնում Օրհուս կենտրոնների հիմնադրման եւ գործունէութեան փորձը համարւում է յաջողակ, եւ մենք ուրախ ենք ներկայացնել մեր փորձն այս ոլորտում», - ասաց ԵԱՀԿ երեւանեան գրասենեակի ղեկավար դեսպան Սերգեյ Կապինոսը:
Մոլդովայի շրջակայ միջավայրի նախարարութեան հանրային տեղեկատուութեան հարցերով աւագ խորհրդատու Ռուսլան Սոչիրկան յաւելեց. «Այս այցը հիանալի հնարաւորութիւն է ուսումնասիրելու մեր հայ գործընկերների` բնապահպանական հանրային տեղեկատուութեան Օրհուս կենտրոնների կենսունակ ցանցի ներդրման ծաւալուն փորձը եւ ընդարձակելու գործակցութիւնը ԵԱՀԿ տարածաշրջանում»:
Մոլդովայի պետական մարմինները նախատեսում էն հիմնադրել Օրհուս կենտրոն, մինչդեռ 2011 թուականին Մոլդովայի մայրաքաղաք Քիշնեւում տեղի կ'ունենայ Օրհուսի կոնուենցիայի մասնակիցների հանդիպումը:
ԵԱՀԿ առաքելութիւնը ֆինանսաւորել է փորձագէտների այցը` ի պատասխան Մոլդովայի բնապահպանութեան նախարարութեան հայցի: