13-07-2012 13:49:29 | Հայաստան | Մամլո հաղորդագրություն
«Չենք լռելու» երիտասարդական նախաձեռնութիւնը հանրութեանն է ներկայացրել իր նոր սոցիալական տեսահոլովակը` սարսափելի չափերի հասնող արտագաղթի եւ դրա պատճառների վերաբերեալ: Հոլովակում ցոյց են տրուած արտագաղթող մարդու մտածմունքները` օդանաւակայանից առաջ: Տեսանիւթի հերոսուհին` միջին տարիքի կին, որոշելի է մեկնել Հայաստանից: Նա արդէն 7 տարի է` չի աշխատում, որովհետեւ, իր համոզմամբ, Հայաստանում աշխատելու համար պէտք է լինել անողնաշար կամակատար կամ պաշտօնեաի բարեկամ: Կինը մտովի քննադատութեան է ենթարկում Հայաստանի իշխանութիւններին, որոնք, օտար Ռուսաստանի կողմից գազի ընդամէնը 7-տոկոսանոց թանկացման դէպքում, հարազատ ժողովրդից 40 տոկոս են պահանջում, իսկ ջրի գինը ջրառատ Հայաստանում նոյնն է, ինչ անապատային Դուբայում:
Հերոսուհին ներողութիւն է խնդրում Հայաստանից այն բանի համար, որ, քաղաքացի լինելով, չկարողացաւ ազատել նրան կեղեքիչներից: Վերջում էկրանին է յայտնւում նախաձեռնութեան ուղերձը, որը կարծում ենք, կը կիսեն Հայաստանի բարեկեցիկ ապագայի համար բոլոր պայքարողները. «Մենք մնալու ենք ու պայքարելու, որ նա վերադառնա...»
«Չենք լռելու» երիտասարդական նախաձեռնութիւն