Ոստիկանութիւնը հետեւողականօրէն ոտնահարում է Րաֆֆի Յովհաննիսեանի իրաւունքները
24-03-2011 10:50:49 | Հայաստան | Քաղաքական
Մարտի 24-ին հայաստանեան մի շարք հասարակական կազմակերպութիւններ հանդէս էն եկել յայտարարութեամբ, որում ասուած է.
«Արդէն իններորդ օրն է, ինչ Րաֆֆի Յովհաննիսեանը հացադուլի մէջ է Ազատութեան հրապարակում: Մենք, ներքոստորագրեալներս, ամբողջովին զօրակցում ենք նրա գործողութիւններին եւ կիսում ենք նրա բոլոր մտահոգութիւնները առանձին եւ ամբողջութեամբ վերցուած, որոնք եւ ստիպեցին նրան դիմել այս միջոցին: Եւ միայն իշխանութիւնների վերաբերմունքն է ստեղծուած իրավիճակին, որ ստիպոմ է մեզ հանդէս գալ այս յայտարարութեամբ:
Այն պահից ի վեր, երբ Րաֆֆի Յովհաննիսեանը դիմել է այս առաւել ծայրայեղ, բայց խաղաղ միջոցին, իշխանութիւնները ուժ չէն խնայում նսեմացնելու նրան եւ ի չիք դարձնելու նրա հսկայական ջանքերն` ուղղուած երկրում ճչացող անարդարութեան վրայ ուշադրութիւն գրաւելուն: Իշխանութիւնները դրանք անում էն թէ ուղղակի` ոստիկանական ուժերի միջոցով եւ թէ անուղղակի` իրենց կամակատար լրատուամիջոցների օգնութեամբ:
Մենք հանդէս ենք գալիս այս յայտարարութեամբ, պահանջելով մեր հայրենակցի իրաւունքների ու արժանապատուութեան պաշտպանութիւնը, որին եւ նա, եւ իւրաքանչիւր այլ քաղաքացի անվերապահօրէն արժանի է:
Մենք պահանջում ենք.
Հայաստանի իշխանութիւնների կողմից անյապաղ ներողութեան հայցում` ի դէմս Ոստիկանութեան, որը հետեւողականօրէն եւ անմարդկայնօրէն ոտնահարում է Րաֆֆի Յովհաննիսեանի իրաւունքները եւ շարունակական ոտնձգութիւններով նուաստացնում է նրա անձը` հակաօրինական ձեւով չթոյլատրելով վրանի տեղադրումը եւ չապահովելով պայմաններ նրա քաղաքացիական իրաւունքների իրականացման համար:
Երաշխաւորել բոլոր անհրաժեշտ միջոցները` ներառեալ, բայց ոչ միայն, տաքացուող վրանի տրամադրումը, բուժանձնակազմի շարունակական ներկայութիւնը եւ ամենակարեւորը` ողջ ընթացքում քաղաքավարի եւ յարգալից վերաբերմունք ոստիկանութեան կողմից:
Յայտարարութիւնը բաց է միանալու համար»:
Բաց հասարակութեան հիմնադրամներ Հայաստան
Հայաստանի հելսինկեան կոմիտէ ՀԿ
Երեւանի մամուլի ակումբ ՀԿ
Համագործակցութիւն յանուն ժողովրդավարութեան ՀԿ
Իրաւունքների պաշտպանութիւն առանց սահմանների ՀԿ
ասպարէզ լրագրողական ակումբ
Խօսքի ազատութեան պաշտպանութեան կոմիտէ
Հելսինկեան քաղաքացիական ասամբլեայի Վանաձորի գրասենեակ