Փետրուարի 28-ին եւ մարտի 1-ին, Ս. Ղեւոնդեանց քահանայից տօնի առիթով, Մայր Աթոռ Սուրբ Էջմիածնում, բարձր նախագահութեամբ Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի եւ մասնակցութեամբ թեմակալ առաջնորդների, տեղի ունեցաւ քահանայից աւանդական ամենամեայ հաւաքը։ Հաւաքին մասնակցում էին Մայր Աթոռի կառոյցներում, վանքերում եւ Հայաստանի ու Արցախի թեմերում ծառայող շուրջ երկու հարիւր յիսուն եկեղեցականներ: Հաւաքի քննարկման նիւթն էր «Ընտանիքը եւ հոգեւոր հովիւը»: Քահանայից հաւաքը բացեց ժողովի համակարգող Շիրակի թեմի առաջնորդ Տ. Միքայէլ եպիսկոպոս Աջապահեանը: Սրբազան Հայրը քահանայից դասի անունից շնորհակալութիւն յայտնեց Վեհափառ Հայրապետին Մայր Աթոռում համախմբուելու, Նորին Սրբութեան օրհնութիւնն ու հայրական պատգամները ստանալու հնարաւորութեան համար: Միքայէլ Սրբազանը նաեւ շնորհաւորեց հոգեւորականներին առաջիկայ տօնի առիթով` մաղթելով նրանց հովուական ասպարէզում յաջողութիւններ: Այնուհետեւ Մայր Աթոռի միաբան Տ. Շահէ աբեղայ Անանեանը եկեղեցականներին ներկայացրեց «Ընտանիքը եւ հոգեւոր հովիւը» թեմայով զեկոյց, որի շուրջ տեղի ունեցան քննարկումներ: Հաւարտ մի շարք քննարկումների հոգեւորականաց դասը հանդէս եկաւ յայտարարութեամբ։ Ժողովի աւարտին ներկայ հոգեւորականներին հայրապետական իր պատգամը յղեց Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսը: Նորին Սրբութիւնն իր գնահատանքը յայտնեց Միքայէլ Սրբազանին եւ մնացեալ թեմակալ առաջնորդներին` քահանայից հաւաքի կազմակերպմանը բերած աջակցութեան համար, ապա շնորհաւորեց հոգեւորականաց դասին ս. Ղեւոնդեանց քահանայից տօնի առիթով` մաղթելով կոչման բարձր գիտակցութեամբ շարունակել հոգեւոր առաքելութիւնը՝ ի նպաստ բարեպաշտ ժողովրդի հոգեւոր կարիքների բաւարարման: Ամենայն Հայոց Կաթողիկոսը ընդգծեց ժողովի քննարկման նիւթ դարձած հայ ընտանիք-եկեղեցի կապի ամրապնդման այժմէականութիւնը` նշելով, որ հովիւները պէտք է մանուկ հասակից զբաղուէն երիտասարդների հոգեւոր դաստիարակութեամբ, ամենօրեայ հովուական հետեւողական աշխատանքով ու հոգատարութեամբ զերծ պահեն երիտասարդ ընտանիքներին տարբեր տեսակի դժուարութիւններից ու փորձութիւններից: Անդրադառնալով եկեղեցականների դերակատարութեանը եւ նրանց առաքելութեանը` Նորին Սրբութիւնը նշեց. «Մեր խնդիրը խաղաղութիւն, սէր եւ հաշտութիւն քարոզելն ու հաստատելն է ընտանեկան եւ ընկերային կեանքում...: Մենք` որպէս եկեղեցականներ, առաւել չափով պարտականութիւններ ունենք մեր ժողովրդի առջեւ` նրանց հոգեւոր-բարոյական կեանքը կազմակերպելու, քրիստոնէական կրթութեամբ եւ դաստիարակութեամբ ապահովելու, որպէսզի ճշմարիտ քրիստոնէական ոգին կրող հայորդիներ ունենանք, խորը հաւատացեալ, աստուածասէր, մարդասէր, եկեղեցասէր մարդիկ, եւ այդ պարտականութիւնը մեր առաքելութիւնն է»: Նորին Սրբութիւնը, անդրադառնալով եկեղեցականութեան ծառայութեանը, արձանագրեց, որ դեռ ահռելի աշխատանք կայ ծառացած Եկեղեցու առջեւ: «Այդ ահռելի աշխատանքը մեզ ոչ թէ յուսալքութեան եւ թեւաթափութեան պէտք է առաջնորդի, այլ ընդհակառակը` մեր մէջ պիտի բորբոքի նախանձախնդրութիւնը, որպէսզի աւելի ճիգ ու ջանք գործադրենք, եռանդ ներդնենք մեր ծառայութեան մէջ», - նշեց Վեհափառ Հայրապետը` յորդորելով հոգեւորականներին հնարաւորն ի գործ դնել առաւել չափով լուսաւոր դարձնելու հայի կեանքը, օգտակարութիւն ունենալու մեր ժողովրդի զաւակներին, նրանց մէջ կրթել լաւատեսութեան, աստուածսիրութեան, հայրենասիրութեան ոգին: Ժողովի ամփոփումից յետոյ Մայր Տաճարում հոգեւոր դասը մասնակցեց երեկոյեան ժամերգութեան եւ ս. Ղեւոնդեանց քահանաների տօնի նախատօնակին: Մարտի 1-ին, Ս. Ղեւոնդեանց տօնին, Մայր Տաճարում մատուցուեց Ս. Պատարագ: Պատարագիչն էր Արմավիրի թեմից Փարաքարի Ս. Յարութիւն եկեղեցու հոգեւոր հովիւ Տ. Գեղամ քահանայ Քեսաբլեանը, ով իր քարոզում անդրադարձաւ տօնի խորհրդին ու նշանակութեանը մեր ազգային կեանքում: Պատարագից յետոյ Վեհարանում տեղի ունեցաւ պարգեւաբաշխութիւն: Տօնի առիթով Ամենայն Հայոց Կաթողիկոսը աւագ քահանայութեան պատիւ շնորհեց Արարատեան Հայրապետական թեմից Տ. Մկրտիչ քհն. Թովմասեանին եւ Տ. Կորիւն քհն. Մարտիրոսեանին, Արմավիրի թեմից Տ. Գեղամ քհն. Քեսաբլեանին: Ծաղկեայ փիլօն կրելու իրաւունք ստացան Արցախի թեմից Տ. Մինաս քհն. Մովսիսեանը, Տ. Էմանուէլ քհն. Վարդանեանը, Սեւանի վանքից` Տ. Մինաս քհն. Մարտիրոսեանը, Հարաւային Ռուսաստանի թեմից Տ. Սարգիս քհն. Պօղոսեանը, Երեւանի Ս. Գրիգոր Լուսաւորիչ մայր եկեղեցուց` Տ. Ղեւոնդ քհն. Մայիլեանը: Լանջախաչ կրելու իրաւունքի արժանացան Մայր Աթոռ Ս. Էջմիածնում ծառայող Տ. Սիփան քհն. Գրիգորեանը, Տ. Սեդրակ քհն. Ազնաւուրեան եւ Տ. Յովհաննէս քհն. Քեսաբլեանը, Արարատեան Հայրապետական թեմից Տ. Եզնիկ քհն. Մալխասեանը եւ Տ. Եփրեմ քհն. Յարութիւնեանը, Շիրակի թեմից Տ. Ստեփանոս քհն. Աւետիսեանը եւ Տ. Յովհաննէս քհն. Ալեքսանդրեանը, Տ. Վարագ քհն. Յակոբեանը, Վայոց ձորի թեմից Տ. Գալուստ քհն. Սահակեանը, Արագածոտնի թեմից Տ. Վիգէն քհն. Մանուկեանը, Կ'ոտայքի թեմից Տ. Վրթանէս քհն. Բաղումեանը, Տ. Արիստակէս քհն. Բաղալեանը եւ Տ. Ժիրայր քհն. Խաչատրեանը, Գեղարքունեաց թեմից Տ. Նշան քհն. Սարգսեանը, Տ. Մեսրոպ քհն. Երիցեանը եւ Տ. Ներսէս քհն. Սահակեանը, Տաւուշի թեմից Տ. Արամ քհն. Միրզոյեանը, Բանակի հոգեւոր հովուութիւնից Տ. Արսէն քհն. Սարօյեանը, Վիրահայոց թեմից Տ. Տաթեւ քհն. Մարուքեանը, Տ. Մովսէս քհն. Մանուկեանը, Տ. Արարատ քհն. Գումբալեանը եւ Տ. Տիգրան քհն. Մխիթարեանը, Վայոց ձորի թեմից Տ. Սեպուհ քհն. Յարութիւնեանը: Մայր Աթոռ Ս. Էջմիածին Տեղեկատուական Համակարգ Մարտի 1, 2011թ.

---