«Ներսում մենք ենք լալիս, դրսում` հայերը»,- ասել է թուրք
իրաւապաշտպանի մայրը
15-02-2011 20:34:00 | Հայաստան | Քաղաքական
ԵՐԵՎԱՆ, 15 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Փետրուարի 15-ին Հայաստանի
ազգային գրադարանում «Յակոբ Մեղապարտ» մեդալ եւ շնորհակալագրեր
յանձնուեցին թուրք իրաւապաշտպան եւ հրատարակիչ Ռագիբ Զարաքօլուին:
Ինչպէս նոյն օրը տեղի ունեցած ասուլիսում նշեց թուրքագետ Արտակ
Շաքարեանը, իրաւապաշտպանն այն սակաւաթիւ թուրքերից է, ով պայքարում
է Թուրքիայի կողմից Հայոց ցեղասպանութեան ճանաչման համար: Նշուեց
նաեւ, որ իրաւապաշտպանի գործունէութեան պատճառով նրա դէմ մի քանի
դատական հայց է ներկայացուել տխրահռչակ 301-րդ յօդուածով:
Թուրք իրավապաշտպանը յայտարարեց, որ ըստ Մարդու իրաւունքների
պաշտպանների յանձնաժողովի, որի ներկայացուցիչն է ինքը, 1915թ.-ի
իրադարձութիւնները լիովին տեղավորվում են միջազգային բոլոր
պայմանագրերով ամրագրուած «ցեղասպանութիւն» հասկացութեան մէջ:
Ռ.Զարաքօլուն նշեց նաեւ, որ «մարդու իրաւունքների խախտումը
Թուրքիայում առաջնահերթ երեւում է Հայոց ցեղասպանութիւնը
չճանաչելու իրողությունից»: Նա լրագրողներին յայտնեց, որ Հայոց
ցեղասպանութեան մասին առաջին անգամ լսել է իր մորից, երբ դեռ
մանուկ է եղել: Մայրը, խօսելով հայերի կրած տառապանքների մասին,
ասել է. «Ներսում մենք ենք լալիս, դրսում` հայերը»: Ըստ
իրաւապաշտպանի, Հայոց ցեղասպանութեան ճանաչումը խղճի
պարտաւորութիւն է, այն Թուրքիային չի նվաստացնի, այլ հակառակը`
կբարձրացնի: «Ես հաւատում եմ, որ դա մի օր տեղի կունենայ»,- ասաց
նա:
Պուրքիայի համար Հայոց ցեղասպանութիւնը ճանաչելու առաջին
արգելքն, ըստ նրա, գաղափարախօսական է, երկրորդը` հոգեբանական,
երրորդը` ֆինանսական փոխհատուցումների հարցն է: Ռ.Զարաքօլուն այն
կարծիքին է, որ նոյնիսկ եթէ Հայաստանն ու Թուրքիան հասնեն ինչ-որ
պայմանաւորուածութեան, նրանք չեն կարող արգելել Հայաստանում կամ
Սփիւռքում բնակուող օսմանեան կայսրութեան հայազգի նախկին
հպատակներին կամ նրանց ժառանգներին իրենց իրաւունքները պահանջել
Թուրքիայից:
Հայ-թուրքական յարաբերութիւնների կարգաւորման գործընթացում
պաշտօնական երկխոսությունից առաւել թուրք իրավապաշտպանը կարեւորում
է քաղաքացիական հասարակութեան երկխօսութիւնը եւ հաւատում, որ հենց
վերջինս կարող է արդիւնք տալ: Իսկ ցեղասպանութեան հարցով
պատմաբանների հայ-թուրքական յանձնաժողով ստեղծելու կապակցութեամբ
թուրք իրավապաշտպանը նկատեց. «Այն ժամանակ, երբ
մերժողականությունը պաշտօնական պետական գաղափարախօսութեան մաս է
կազմում, պատմաբանները չեն կարող քննարկել այդ հարցը այդ
տեսանկիւնից»: